Beachd Ailein
FIU ’S MUS FHACA MI an seann chàr aig mo charaid Iain Fearchar Rothach nach maireann taobh a-mach Chaol Loch Àillse Dihaoine seo chaidh, bha tomhas de chianalas air bualadh orm beagan roimhe sin is mi a’ siubhal bhon Eilean Sgìtheanach gu ruige Inbhir Nis.
Bha an rathad trang da-rìribh agus saoilidh mi gum bheil buaidh turasachd follaiseach air taobh an iar Alba an ìre mhath fad na bliadhna a-nise. ‘S e dhùisg mo chuid cianalais gun robh sreath charbadan a’ sìneadh air ais chun an stèisean connaidh air taobh an ear a’ Chaoil, neo Garaids Alby mar a bhios mise fhathast a’ smaoineachadh air ged is fhada bho dh’atharraich an suidheachadh sin.
Thàinig deàlradh cuimhne thugam air an liuthad turas a bha mise, mar na mìltean eile thar nam bliadhnaichean, aig amannan nam thàmh anns a’ Chaol neo an Caol Àcainn a’ feitheamh uairean a thìde ri aiseag! Gun teagamh bidh an aon seòrsa cuimhne aig iomadach neach air aiseagan eile, leithid Baile Chaolais, agus ged a bha leithid sin de dhàil na chothrom air beagan foise san t-siubhal, bha e cuideachd gu math mì-ghoireasach dha daoine aig an robh ri bhith aig ceann-uidhe sònraichte aig àm àraid. Cha b’ iongnadh mar sin ged a bha mì-fhoighidinn bitheanta agus ‘s dòcha fiù ’s ìre dràibhidh nas luaithe agus nas mì-chùramaiche ri linn sin agus na maille a chaidh air an fheadhainn a bha air thuras.
Ged is dòcha nach eil mòran mothachail air sin, bha pàirt mhòr aig Iain Noble anns an iomairt gus drochaid a thogail aig Baile a’ Chaolais, agus bhuinnig an t-srì aig Iain Fearchar agus iomadach neach eile thar mòran bhliadhnaichean drochaid an Eilean Sgitheanaich. Tha na sochairean sin cho goireasach an-diugh is gum bheil e furasta dìochuimhneachadh cho eadar-dhealaichte ‘s a bha cùisean roimhe, agus saoilidh mi nach eil sinne a tha a’ còmhnaidh air tìr-mòr Alba idir cho mothachail neo tuigseach air mar a tha beatha làitheil mhuinntir Eileanan an taobh an iar agus tuath an eisimeil sheirbheisean aiseagan.
Choisinn seirbheis dhìleas bhàtaichean Mhic a’ Bhriuthainn cliù thar iomadh bliadhna air an taobh an iar agus bha iad airidh air sin, agus rinneadh gàirdeachas nuair a ghlèidh Calmac ùrachadh cùmhnant bho chionn ghoirid.
Ach ann an saoghal far am bheil barrachd is barrachd sluaigh gan tàladh chun an iar, agus tuath, fad na bliadhna, tha e furasta a thuigsinn gum bheil dùbhlan lìbhrigidh sheirbheisean aiseig gu bhith nas dorra mar a tha an ùine a’ dol air adhart. ‘S i leth na cèairde an t-inneal, agus gun bhàtaichean chomasach gu leòr tha an dùbhlan sin gu bhith nas miosa buileach.
LIFELINE ferry services exist to serve remote communities but as tourism develops into a year-round industry, the provision of these services becomes increasingly challenging on the west coast and the islands.
If the tools be half the trade as a proverb states, then CalMac requires an urgent upgrading of its fleet to maintain a well-earned service reputation.