Beachd Ailein
An saoil sibhse gum bheil Dòmhnall Trump airidh air duais sìth Nobel? Ged a tha an t-adhartas anns a’ cho-luadar le Ceannard Chorea a Tuath gun teagamh a’ coileanadh rùn an tiomnaidh aig Nobel airson na duais, feumar aideachadh gum bheil Ceann-suidhe Ameireagaidh a’ suirghe sìth air aon làimh agus a’ dùsgadh mì-rùn agus aimhreit air an làimh eile.
Mar a chanadh mo sheanair “nì amadan sam bith cogadh ach ‘s e duine glic a nì sìth!” Dh’iarr Nobel an duais a thoirt dhan neach a bu mhotha a rinn gus càirdeas a stèidheachadh eadar chinnidhean, gus feachdan armaichte a lughdachadh, agus gus còmhraidhean sìthe a chur air adhart.
Ged a tha tachartasan Chorea a’ coileanadh nan amasan sin, tha na co-dhùnaidhean a dh’fhàg Ameireagaidh a’ cur bhacaidhean malairt air dùthchannan eile an t-saoghail mar-thà ag adhbharachadh eas-aonta agus sgaradh, agus tha cunnart ann gum fàs na duilgheadasan sin nas guiniche.
An e gu ìre “comhairle bhuam nach d’ fhuaireadh agam” a th’ aig Trump is e a’ moladh fois fòirneart dha feadhainn eile fhad ’s a tha e fhèin a’ bagairt is a’ maoidheadh.
Aig an aon àm tha dùbhlan eadar-nàiseanta a’ leantainn a thaobh fhògarraich a’ sireadh comraich agus dachannan ùra anns na dùthchannan as beartaiche den t-saoghal, agus tha sin na dhuilgheadas shònraichte anns an Roinn Eòrpa agus ann an Ameireagaidh.
Ged is e sealladh gun eireachdas a th’ ann a bhith a’ faicinn na h-Eadailt a’ diùltadh fhògarraich a chaidh a theasairginn anns a’ Mhuir Mheadhanach a leigeil air tìr, ‘s e am masladh as motha uile gu lèir clann a bhith gan sgaradh bhom pàrantan air crìochan nan Stàitean Aonaichte agus gan cròthadh ann an cèidsichean.
Thug dìteadh eadar-nàiseanta air Trump am poileasaidh seo atharrachadh ach tha fhios gun dìol a’ bhrùidealachd seo air a sheasamh feadh an t-saoghail, agus na dhùthaich fhèin.
B’ e ceann-suidhe Ameireaganach eile a thuirt nach robh neach riamh cho àrd ‘s a bha e nuair a chromadh e gus cobhair a dhèanamh air leanabh, agus tha an òraid ainmeil eile aig Abraham Lincoln aig cladh Gettysburg san t-Samhain 1863 air a meas mar thè de phrìomh òraidean mhac an duine.
Ann an dà cheud seachdad is trì facal chuir Lincoln an cèill feallsanachd saorsa sluaigh Ameireagaidh agus an cuid creideis ann an co-ionannachd a’ chinne-daonna.
Ach chan eil brìgh neo gliocas na h-òraid sin air buaidh sam bith a thoirt air cuid mhòr de shluagh Ameireagaidh mar a tha suidheachadh chòraichean thùsanach na dùthcha, agus dhaoine dubha anns na stàitean aig deas, a’ dearbhadh. An e ìomhaigh “dhùthaich na saorsa” an naidheachd as meallta a th’ ann dha na daoine sin?
Abraham Lincoln famously said that no man was so tall as when he stoops to help a child. Donald Trump stooped as low as any modern leader and his brutal policy of wresting children from parents has been internationally and rightly condemned! Nobel peace prize material? Surely not!