Gach là na latha-sgoile!

Bliadhnaichean de dheasachadh agus chaidh Mòd Nàiseanta Rìoghail 2019 seachad mar chlach a’ ruith le gleann! Ach bha e soirbheachail, taitneach, agus adhartach dhan Ghàidhlig, agus mo thaing dhùrachdach dha na h-uile a dh’obraich cho cruaidh gus a thoirt gu bith! Bha sgioba beag a’ Chomuinn Ghàidhealaich dèanadach agus èifeachdach, agus choisinn a’ Chomataidh Eagrachaidh moladh airson a cuid obair-deasachaidh agus bha a cuid bhall agus luchd-taice saor-thoileach eile a thug iad leotha uile dìcheallach agus èasgaidh. Tha sluagh-ghairm aig Glaschu gur iad a chuid sluaigh a dh’fhàg am baile gun choimeas, agus ’s e mo bheachd gur iad daoine a tha cuideachd a’ fàgail Mhòdan cho sònraichte. Mar a tha An Comunn a’ comharrachadh tric cha tachradh Mòdan Ionadail neo Nàiseanta idir cho soirbheachail mura b’ e taic nam mìltean de dhaoine a tha toirt ùine, agus sgilean, gu saor-thoileach dha na tachartasan agus dhan Ghàidhlig.

Bidh e a’ cur tàmailt orm nuair a chluinneas mi cuideigin ag ràdh gun dearbhadh sam bith nach eil Mòdan a’ brosnachadh dhaoine gus Gàidhlig ionnsachadh. Bha fianais gu leòr ri chluinntinn aig Mòd Nàiseanta na bliadhna seo nach eil an dìteadh sin idir fìor! Bu mhath gun sguireadh luchd-iomairt, a tha nam beachd fhèin a’ seasamh chòraichean na Gàidhlig, de chur sìos air structar a chùm an cànan fa chomhair an t-saoghail fad còrr air sia fichead bliadhna mur eil dad nas fheàrr aca ri mholadh. Mo bheannachd aig neach sam bith a nì iomairt a bhrosnaicheas fàs na Gàidhlig, ach saoilidh mi nach eil e gu feum sam bith cur às do bhunaitean stèidhichte gun dad dearbhte nas fheàrr a thèid na àite. Bhruidhinn mi ri mòran tron t-seachdain a thàinig chun Ghàidhlig tron Mhòd, agus an cuid meas air òrain Ghàidhlig. Adhbhar molaidh, seach adhbhar càinidh, tha fhios!

B’ e urram sònraichte a bh’ ann dhòmhsa airson a’ chiad turas mar Cheann-suidhe, Bàrd a’ Chomuinn Ghàidhealaich a chrùnadh. Mar a bhios fios agaibh tha urram a’ Bhàird air a bhith a’ seasamh fad trì bliadhna bho chionn greise a-nise, ach ri linn neartachadh litreachas Gàidhlig thar nam bliadhnaichean seo chaidh, cho-dhùin An Comunn tilleadh, le taic Chomhairle nan Leabhraichean Gàidhlig, gu taghadh agus crùnadh bliadhnail. Dh’ionnsaich Bàrd 2019, Sandaidh NicDhòmhnaill-Jones, a cuid Gàidhlig gu fileantas ri linn meas air ceòl Gàidhlig, agus abair tosgaire comasach dhan chànan! Bha e cuideachd na thlachd air leth Aigeallan Airgid nam Fear aig a’ Chomunn a thoirt seachad dha Calum MacColla às a’ Ghearastan a thòisich air Gàidhlig ionnsachadh mar urram dha cuimhne athair Teàrlach nach maireann. Bha e cuideachd na thoileachas Duais Cuimhneachaidh Thòmais agus Raonaid Mitchell, a rinn uimhir dhan Ghàidhlig agus dha Mòdan, fhaicinn ga stèidheachadh leis a’ Chomataidh Eagrachaidh Ionadail agus ga bhuileachadh air Luke MacIain bho Sgoil Sir E Scott. Cuimhneachain shònraichte am measg mhòran eile!

Thanks Glasgow, was the message as thousands of visitors headed home from the 2019 Royal National Mod following the massed choir finale on the steps of Glasgow Royal Concert Hall last Saturday. Fond memories.