Beachd Ailein
Saoil an robh rianadairean NATO a’ smaoineachadh air teachdaireachd sìth na Nollaige nuair a chuir iad air dòigh coinneachadh aig toiseach An Dùbhlachd ann an Lunnainn? Bha iad a’ comharrachadh seachdad bliadhna bhon a chaidh a’ bhuidheann a stèidheachadh an dèidh uabhasan dà chogadh mòr fhulang taobh a-staigh trithead bliadhna. Ann an 1949, le mothachadh cràiteach air na milleanan a chailleadh agus an ùine mhòr leigheis a bha roimh gach dùthaich air an tug na blàir sin buaidh, chuir NATO sìth mhaireann dha na dùthchannan a tha an nàbachd chinn a-tuath a’ Chuain Shiar roimhe mar amas.
Ged nach deach aig a’ chaidreachas air sin a’ choileanadh gu buileach chaidh aig na buill air mòran eas-aonta eadar-nàiseanta a chothromachadh le gleustachd deasbaid thar nam bliadhnaichean. Cha b’ iongnadh mar sin gum bithte a’ sùileachadh gum biodh ceannardan nan dùthchannan fa leth a’ tighinn gu coinneamh Lunnainn le rùn còrdadh agus corèiteachadh mar a bhiodh feum. Tha an t-sìth phrìseil ann an suidheachadh cugallach, le armachd niuclasach a’ bagairt sgrios nas miosa na dad a chunnacas riamh.
Ach an àite leithid sin de lèirsinn chunnacas cuid de cheannardan le àrdan agus ladarnas a’ cur euchdan NATO ann an suarachas, agus a’ call sealladh air na dleastanasan eadar-nàiseanta a th’ orra fhèin mar stàitirean. ‘S minig a tha mi air faclan mo sheanar a thogail an seo roimhe, gun dèan amadan sam bith blàr ach gur e duine glic a nì sìth! Dhealaich iad fo sgleò nach eil a’ toirt cus misneachd air co-obrachadh dealasach airson math an t-saoghail, agus is bochd sin is còmhraidhean air a bhith a’ dol aig an aon àm san Spàinnt air suidheachadh àrainneachd an t-saoghail agus agairt èiginneach làidir ga dhèanamh gun co-obraich dùthchannan an t-saoghail còmhla gus a’ phlanaid a ghleidheadh.
Gu mì-fhortanach, aig an ìre seo co-dhiù, saoilidh mise nach eil cus misneachaidh ann am modh-giùlain chuid de na ceannardan as cumhachdaiche, agus tha olc eile cuideachd a’ nochdadh às ùr a tha na dhragh mòr.
Tha casaidean gràin-cinnidh air a bhith gan cur às leth caochladh phàrtaidhean phoilitigeach san dùthaich seo, agus ma ghabhar ri giùlan luchd-leantainn spòrs mar sgàthan air coimhearsnachdan tha e follaiseach gum bheil gràin-cinnidh agus faisisteachd a’ fàs am measg luchd-taice ball-coise gu h-eadar-nàiseanta. ‘S e teachdaireachd gu math dubhach a th’ aig ceannard UEFA is e ag ràdh gum bheil an trioblaid aingidh seo a’ sìor dhol am meud.
Nuair a smaoinicheas sinn air ais air an dàrna cogadh cha b’ iongnadh am fiosrachadh seo a bhith na adhbhar dragha, agus tha e tur ceart dhuinn a bhith a’ sùileachadh ghluasadan làidir agus toinisgeil bho cheannardan NATO agus eile gus an t-sìth, agus an àrainneachd, a dhìon.