Beachd Ailein
Air an t-seachdain a chaidh thug mi iomradh air na bha ag ràdh gum biodh an saoghal againn uile gu math eadar-dhealaichte mun àm a bhios suidheachadh èiginneach a’ chorònabhìorais seo seachad. Uill gu ìre tha sin air tachairt mar-thà, taobh a-staigh seachdaine! Chan fhacas riamh riaghaltas a’ cur uimhir de mhaoin poblach an sàs gus cosnaidhean agus gnìomhachas na roinne prìobhaidich a dhìon, gun ghuth air gur e riaghaltas Tòraidh a tha a’ dèanamh sin! Tha an riaghaltas cuideachd ag aithneachadh nach eil làn-bhuaidh an tinneis seo fhathast air sgaoileadh feadh Bhreatann agus gum feum e ’s dòcha riaghailtean fiù ’s nas teinne a chur an gnìomh gus feuchainn ri smachd a ghleidheadh air an astar aig an sgaoil a’ bhìoras. Tha sin gu bhith deatamach gus dìon a thoirt air comas sheirbheis na slàinte dèiligeadh ri meud na h-uallaich a bhios air. Chan fhacas riamh leithid de dhùbhlan tinneis a’ bualadh feadh an t-saoghail aig aon àm agus tha dìth banachdaich a’ ciallachadh gum faodadh dùbhlan a’ chorònabhìorais a bhith na thrioblaid airson còrr math air bliadhna romhainn. Chan eil teagamh nach eil an saoghal againn ann an Alba air atharrachadh ged nach biodh ann ach gum bheil sgoiltean uile dùinte agus casg air deuchainnean airson a’ chiad turas ann an 132 bliadhna.
Mar a bhiodh dùil ’s dòcha tha cuid nach eil a’ gèilleadh ri comhairle oifigeil a thaobh a bhith a’ dol an cuideachd dhaoine eile, agus gun teagamh tha dìorrasachd aineolach nan daoine sin dol a chur beatha chuid eile ann an cunnart. Theagamh gun tig an tuilleadh bhacaidhean air saorsa gluasaid mar mheadhan air dèiligeadh ris an fheadhainn nach gabh comhairle agus bidh sin tàmailteach dhan mhòr-chuid a tha gu bhith ciallach. Gun teagamh sam bith tha daoine a’ gabhail an eagail far am bheil uimhir de mhì-chinnt, agus a dh’aindeoin comhairle chiallach a thaobh leithid ceannach bìdh tha cuid a’ call smachd orra fhèin nuair a chì iad feadhainn eile a’ càrnadh gun adhbhar. ’S dòcha gum feum barrachd smachd a ghabhail air sin cuideachd. Chuala mi aon neach-labhairt a’ nochdadh beachd gum bheil eachdraidh a’ sealltainn gum bi cuid de riaghailtean a thig ann an leithid seo de shuidheachadh uaireannan a’ leantainn an dèidh dhan trioblaid falbh. Bidh sinn an dòchas nach tachair sin! An dèidh dìreach beagan làithean de na h-oghaichean againn a’ gabhail ris a’ chomhairle seann daoine a sheachnadh tha sinn ga fhaotainn gu math annasach, agus ag ionndrainn an cuid cuideachd is crac. Cha tig crìoch air leithid sin de sgaradh luath gu leòr dha seann-phàrantan uile!
Cha tàinig làn gun muir-tràigh na dèidh, agus feumaidh sinn misneachd a ghleidheadh. Ma tha gàrradh agaibh theirigibh an sàs ann, mur a bheil gabhaibh tlachd à sìneadh làithean earraich agus cuimhneachain air àm buain mhònadh, cur buntàta, is corc! Agus cumaibh sàbhailte!