Beachd Ailein
editor@obantimes.co.uk
Nach tric a chluinnear gun tig math à olc, agus tha mòran a’ fàs mothachail air mar a tha an impidh a th’ oirnn uile fuireach aig ar dachannan a’ toirt cothrom sealltainn ri rudan a bha sinn ’s dòcha a’ cur dheth bho chionn greise. ’S e fìrinn na cùise gum bheil beatha làitheil dhaoine, agus gu h-àraid feadhainn a tha fhathast a’ cosnadh agus a’ togail teaghlach, air fàs cho dripeil is nach eil iad ag amas air mòran a dh’iarradh iad a dhèanamh. Chuala mi fiù ’s aon mhàthair ag ràdh gum bheil an fhèin-aonaranachd a’ toirt cothrom luachmhor dhi ùine a chur seachad cuide ri a cuid cloinne. Anns an àbhaist tha a saoghal, mar a tha saoghal nam milleanan, air giùladair a tha ga lìonadh le uallaichean obrach agus dhleastanasan làitheil. Dè an seòrsa rudan ris am bheil cothrom againn sealltainn a-nise ma-thà? Leabhraichean sònraichte ’s dòcha, neo sùil a thoirt air seann dealbhan teaghlaich, neo ’s dòcha ùrachadh eòlais a dhèanamh le fònadh gu caraid. Theagamh nach eil an dealbh a thug am bàrd Niall MacLeòid, le greis air sùgradh, greis air dannsa, greis air canntaireachd, is ceòl, cho coltach san là an-diugh ach gu cinnteach nì aighear feum agus togail inntinn. Theagamh gun cuir daoine cuideachd luach air ùine a bhith aca smaoineachadh air mar a thèid aca air taic is coibhneas a’ nochdadh do dhaoine eile nach eil ann an suidheachadh cho cofhurtail riutha fhèin.
Nì gnìomhan beaga coibhneil atharrachadh mòr glè thric agus tha fianais làitheil againn air mar a tha daoine deiseil gus taic shaor-thoileach a thoirt nuair a tha cùisean duilich. Chan eil fios againn dè cho fada ‘s a dh’fhaodadh an suidheachadh seo mairsinn agus cha mhotha na sin a tha fios dè a’ bhuaidh a bheir aonaranachd fhada air daoine. Bidh cunnart ann gum fàs cuid cho draghail le bhith air an cuingealachadh agus gum bris iad na riaghailtean a tha an riaghaltas air a chur oirnn. Dh’fhaodadh sin ciallachadh gun tèid poileas an sàs le làmhachas-làidir a bhios thar tòimhsean agus gum fàs eas-ùmhlachd poblach. ’S e dealbh eagalach a tha sin agus mar a tha mi air a ràdh roimhe chan eil farmad sam bith agam ri luchd-riaghlaidh aig am bheil uallach stiùiridh chor na dùthcha aig an àm seo. Tha iadsan a’ dèanamh an dìchill a’ leantainn na comhairle saidheansail a tha iad a’ faotainn, agus buidheachas dha na mìltean de luchd-obrach sheirbheisean deatamach de gach seòrsa a tha gan cur fhèin ann an gàbhadh gach latha ag obair dhuinn uile!
Ach tha cor na dùthcha agus mar a gheibh i thairis air sgrios a’ chorònabhìoras gu bhith cuideachd gu mòr an urra ris an t-sluagh gu lèir, agus mar is motha feairt a bheir sinn dha na riaghailtean aonaranachd ’s ann as luaithe a thèid an trioblaid seachad. Sùil eile air na seann dealbhan ud ma-thà!
Enforced isolation can allow time to tackle long-standing to-do lists!