Beachd Ailein
Tha luach leithid an eadar-lìon agus fòn follaiseach, ach ’s ann air sgìrean iomallach na dùthcha as luachmhoire iad buileach. Ann am baile-mòr tha cuideigin nas dualtaiche bhith faisg, seach mar eisimpleir, mar a bhiodh an àiteigin air rathad aonranach air Ghàidhealtachd. Ach far am bheil feallsanachd calpachais a’ riaghladh tha feumalachdan sheirbheisean èiginn tric air deireadh ann an roinn na maraig ionmhais phoblaich!
Chan eil teagamh nach eil cothroman gu bhith ann cuid a rudan a dhèanamh ann an dòighean eadar-dhealaichte, agus nas goireasaiche, nuair a bhios sgrios a’ chorònabhìorais seachad. Bidh na fiachan aig mòran bhuidhnean cho trom agus gum bithear a’ lorg a h-uile caomhnadh. Sin is coireach gum bheil mi den bheachd gum bi fada bharrachd dhaoine ag obair bhon dachannan seach mar a bha. Gu ruige seo b’ e rud a bh’ ann a thachradh corra uair seach gu h-àbhaisteach, ach ma tha e dol a dh’fhàs nas bitheanta dh’fhaodadh cothrom leasachaidh math a bhith an sin dha coimhearsnachdan an iomaill.
Fad bhliadhnaichean tha draghan air nochdadh a thaobh ’s mar a tha daoine òga gan sìoladh a-mach à sgìrean nan oirean ri linn dìth chothroman cosnaidh agus ghoireasan de gach seòrsa. Ged a tha Comhairlean a’ dèanamh an dìchill a thaobh sheirbheisean dha na coimhearsnachdan sin tha buaidh mhòr aig neart eaconamach na sgìre air an seòrsa taice a gheibh i. Ma ghabhas dearbhadh gum faod fichead cosnach obrachadh à baile cruite air taobh siar Alba, pailt cho furasta ‘s a bhiodh air iomall baile-mòr am meadhan Alba neo fiù ’s Shasainn, carson nach fhaodadh sin tachairt? Agus an cois ùrachadh eaconamach nan sgìrean sin carson nach fhaodadh beatha chultarail, Ghàidhlig, nan coimhearsnachdan sin a bhith air am beothachadh aig an aon àm. Tha mi mothachail gum bheil mi a’ cur air adhart an seòrsa argamaid a bhiodh aig mo charaid Iain Noble nuair a choinnich mi ris an toiseach còrr air dà fhichead bliadhna air ais, agus nuair nach robh fiù ’s goireasan fòn dòigheil ann an iomadach sgìre. Ach seallaibh an dìleab a dh’fhàg feallsanachd Iain ann an ceann a deas an Eilean Sgitheanaich!
Tha a-nise còraichean laghail aig dachannan agus gnìomhachasan seirbheis dhòigheil eadarlìon agus fòn iarraidh fo Dhleastanas Seirbheis Uile-choitcheann a tha Ofcom a’ stiùireadh às leth an Riaghaltais. ’S e cothrom sònraichte a tha seo dha Buill Pàrlamaid agus dha Comhairlean sàr ghoireasan eadar-lìon agus fòn iarraidh dha na sgìrean iomallach, agus gun tèid sanasachd a dhèanamh air na cothroman a th’ ann dha companaidhean aig deas a bhith a’ stèidheachadh fastaich aig tuath!