Dreuchd ùr ann an 2022?
Aig an àm seo den bhliadhna, bidh sinn gu tric a’ smaoineachadh air ar dreuchdan atharrachadh agus mar sin is dòcha gum bi an goireas ùr aig Bòrd na Gàidhlig feumail dhuibh ma tha sibh a’ beachdachadh air dreuchd ùr ann an teagasg tro mheadhan na Gàidhlig. A’ leantainn air na dleastanasan agus geallaidhean a tha ann am Plana Cànain Nàiseanta Gàidhlig 2018-23 gus tidsearan Gàidhlig a thrusadh, a ghlèidheadh is oideachadh agus sanasachd a dhèanamh air teagasg Gàidhlig mar dhreuchd, tha Bòrd na Gàidhlig air padlet a chruthachadh mar ghoireas ùr. Tha seo a bharrachd air a’ bhileag aig Comhairle Choitcheann Teagaisg na h-Alba ‘A bheil thu airson teagasg sa Ghàidhlig?’.
Dè a th’ann am padlet?
’S e goireas didseatach a th’ ann am padlet a tha a’ tabhann aon àite airson stuthan a chur an cèill – nàdar de bhòrd-fiosrachaidh air-loidhne - far a bheil làraich-lìn, sgrìobhainnean agus bhideothan air an cruinneachadh air balla. Air gach padlet lorgair na slighean eadar-dhealaichte a-steach gu teagasg sa Ghàidhlig, air an cruinneachadh agus air an taisbeanadh ann an cruth soilleir. Tha e na amas gum bi seo na dhòigh shìmplidh agus tharraingeach dha daoine am fiosrachadh a tha a dhìth orra gus gluasad gu teagasg sa Ghàidhlig a lorg ann an aon àite.
Cò dha a tha e?
Tha aon phadlet ann a tha ag amas air stiùireadh a thoirt do thidsearan clàraichte a tha airson an sgilean cànain a leasachadh gus gluasad gu Foghlam tro Mheadhan na Gàidhlig; agus padlet eile dhaibhsan a tha a’ beachdachadh air cùrsa Foghlam Gàidhlig a dhèanamh aig ìre fo-cheum no iar-cheum gus Gàidhlig a theagasg na cuspair fhèin neo cuspair àrdsgoile a theagasg tro mheadhan na Gàidhlig.
Ciamar a gheibh mi cothrom air?
Gheibh sibh a-steach dhan phadlet le bhith a’ sganadh an còd QR leis an inneal agaibh. Ma tha ceistean sam bith agaibh, nach cuiribh fios don Oifigear Leasachaidh againn aig angela@gaidhlig.scot