Na Trads ag aithneachadh sàr cheòl thradaiseanta na dùthcha
Tha prìomh thachartas ann an saoghal a’ chiùil thradaiseanta, Duaisean Ceòl Tradaiseanta na h-alba MG ALBA, a’ tighinn gu baile Phàislig airson na ciad uair am-bliadhna. Ann an oidhche de cheòl ’s de chliù, bidh na ceudan de luchd-ciùil agus luchd-leanmhainn a’ cruinneachadh còmhla anns a’ bhaile eachdraidheil a tha seo is iad air bhioran gus faighinn a-mach cò a tha gu bhith air an aithneachadh anns na duaisean.
Bidh Màiri Anna Nicualraig agus Tony Kearney a’ lìbhrigeadh na h-oidhche is iad a’ cur fàilte air aoighean is farpaisich maille ri luchdamhairc telebhisein agus ris an t-saoghail mhòir gu Ionad iongantach an Lagoon ann am meadhan a’ bhaile, dìreach mus faigh Pàislig a-mach buil an tagraidh aca fhèin airson inbhe Baile Cultarach na Rìoghachd Aonaichte 2021. Bidh aire na h-uile air Pàislig agus an oidhche shònraichte seo ga sgaoileadh beò gu luchdamhairc air feadh an t-saoghail tro làrach-lìn BHBC ALBA agus aig an dachaigh air BBC Radio Scotland.
Anns na còig bliadhna deug bho thòisich na Duaisean, tha an tachartas cliùiteach air e fhèin a stèidheachadh mar thaisbeanadh de bhuile cridhe is anam ceòl dualchasach na h-alba. Thuirt Simon Thoumire, a stèidhich is a bhios a’ cur an tachartais air adhart, “We are dedicated to showcasing the level of talent in this country and the awards are a real highlight in the calendar each year. We can’t wait for an unmissable night of live music.”
Bidh an t-àrd-ùrlar a’ taisbeanadh iomadachd a’ chiùil san là an-diugh le còmhlain is seinneadairean, a leithid The Shee, Siobhan Miller, Elephant Sessions, Neach-ciùil-thradaiseanta Òg na Bliadhna, Teàrlach Stiùbhart, agus, a’ comharradh nan ceanglaichean ri Pàislig le bhith a’ dèanamh luaidh air a’ bhàrd Dòmhnall Ruadh Phàislig, bidh sgioba de sheinneadairean à Uibhist ann, nam measg Màiri Nicaonghais, Gillebrìde Macillemhaoil agus Sìneag Nic an t-saoir.
Thèid an t-urram as àirde a bhuileachadh orrasan, fa leth no ann am buidhnean, a tha air atharrachadh brìghmhor a thoirt air ceòl is cultar na h-alba, a tha air daoine eile a bhrosnachadh agus air leasachaidhean cultarach a phiobrachadh. Tha na trì duaisean sònraichte - Seirbheisean às leth na Gàidhlig, Seirbheisean às leth na h-albais, agus Duais Hamish Henderson - a’ comharradh euchdan ionmholta ann an ceòl na dùthcha.
An ath-sheachdain ann am Pàislig, thèid an duais Seirbheisean às leth na Gàidhlig a bhuileachadh air aonan de bhana-ghaisgich ar cànain ’s ar dualchais, Ceana Chaimbeul MBE, mar aithneachadh air an obair ionmholta anns a bheil i air a bhith an sàs fad a beatha mar sheinneadair, neach-teagaisg, sgrìobhaiche agus ann an iomadh iomairt às leth na Gàidhlig. Tha Ceana air cliù a chosnadh mar sheinneadair is seanchaidh Gàidhlig cho barraichte ’s a tha ann an Alba. Tha i mar bhall de theaghlach seinn cliùiteach agus aig cridhe dìleib chultaraich anns a bheil mòr-bheartas.
Thèid cànan na h-albais a mholadh air an oidhche nuair a thèid an duais Seirbheisean às leth na h-albais a bhuileachadh air dithis a bhios an sàs gu mòr anns a’ chànan tro litreachas. Tron bhuidheann foillseachaidh aca, Itchy Coo, tha Matthew Fitt agus James Robertson air a bhith a’ stiùireadh spàirn às leth litreachas is cànan na h-albais. Le bhith ga cur air adhart anns na sgoiltean agus a’ toirt clann-sgoile gu bhith a’ leughadh na h-albais, tha iad air atharrachadh-bheachd brìghmhor mun chànan a thoirt gu buil.
Tha an Dr Jo Miller, neachciùil is foghlaim, buadhach air Duais chliùiteach Hamish Henderson a chosnadh, is i air tòrr dhe h-ùine is dhe tàlant a chur seachad ann a bhith ag ath-bheothachadh is ag adhartachadh ceòl tradaiseanta aig ìrean bunaiteach agus aig ìrean acadaimigeach.
A-nochd (Disathairne an 25mh) air BBC ALBA, air thoiseach air tachartas Na Trads fhèin, bidh cruinneachadh de thàlant ainmeil a’ comharradh tachartas a tha air a bhith a’ dol fad 15 bliadhna ’s a tha a-nise stèidhichte a thaobh inbhe agus cliù. Anns Na Trads Aig 15, bidh riochdairean le ceanglaichean cultarach, poileataigeach agus craolaidh, còmhla ri feadhainn a choisinn duaisean roimhe, a’ dèanamh luaidh air an tachartas.
A bharrachd air a sin, bithear a’ toirt sùil air ais thar nam bliadhna tro cheòl is cuimhneachain thiamhaidh agus cuid eile a dhùisgeas gàire.
Thig Simon Thoumire agus a’ choimhearsnachd ciùil a thèid a moladh air an oidhche cruinn còmhla airson na chòigeamh cuirme deug de Dhuaisean nan Trads ann am Pàislig air an 2mh latha den Dùbhlachd. Bidh na Trads Aig 15 mar ro-ràdh iomchaidh dhan taisbeanadh sin.
Thèid Na Trads Aig 15 a chraoladh aig 21.00 Disathairne 25 Samhain agus tachartas Na Trads aig 21.00 Disathairne 2 Dùbhlachd air BBC ALBA agus air BBC Radio Scotland.