Iomairt gus sluagh a thilleadh do dh’fhearann a tha falamh
Chan fheum thu a dhol ro fhada airson tobhtaichean fhaicinn ann an tòrr de na sgìrean air a’ Ghàidhealtachd agus sna h-eileanan. Tobhtaichean a tha nan samhlaidhean balbh air coimhearsnachdan a bh’ ann mus do dh’fhalbh na daoine no mus deach am fuadach às na h-àiteachan sin. Ach a rèir Fearann Coimhearsnachd na h-alba, bu chòir cumhachdan laghail a stèidheachadh far an gabh pàirt den fhearann fhalamh seo a cheannach no a chur gu feum le coimhearsnachdan feuch am bi barrachd fearainn ann far am faod daoine fuireach.
Tha Fearann Coimhearsnachd na h-alba air grunn chumhachdan a bharrachd a mholadh, a bhiodh nam pàirt dhen Bhile Phlanaidh a tha dol tro Phàrlamaid na h-alba an-dràsta, gus piseach a thoirt air sgìrean dùthchail agus cothroman a chruthachadh airson sluagh a thilleadh gu àiteachan a tha air a bhith falamh fad iomadh bliadhna.
Tha a’ bhuidheann iomairt a’ moladh gun stèidhich Riaghaltas na h-alba poileasaidhean planaidh ùra a bheireadh taic do na h-amasan aca: gum bu chòir àireamh an t-sluaigh ann an sgìrean dùthchail na h-alba a mheudachadh, agus gum bu chòir sluagh a thilleadh gu fearann far am b’ àbhaist do dhaoine a bhith a’ fuireach agus far nach eil sluagh no mòran sluaigh a-nis.
Tha iad cuideachd ag iarraidh gun cruthaich an Riaghaltas map ade“choimh ears nachd an a chleachd a bhith ann” ann an Alba. Thathar a’ moladh a’ mhapa seo mar fhreagairt gu ìre air ‘a’ Mhapa de Thalamh Fiadhain’ a bhios daoine a’ cleachdadh gus taic a chumail ris na h-argamaidean aca gus talamh a chumail falamh. Seallaidh seo gun robh daoine a’ fuireach ann an cuid de na h-àiteachan falamh seo aig an aon àm, agus gum bu chòir smaoineachadh air daoine a thilleadh gu na h-àiteachan sin a-rithist.
Am measg na tha Fearann Coimhearsnachd na h-alba a’ moladh, tha na cumhachdan a leanas dhan Riaghaltas: gum b’ urrainn dhaibh fearann a chomharradh mar fhearann air an tèid daoine a thuineachadh a-rithist; gum b’ urrainn dhaibh fearann a cheannach gu h-èigneachail air an adhbhair sin; gum b’ urrainn dhaibh a’ chòir a thoirt do choimhearsnachd fearann a cheannach airson daoine a chur a dh’fhuireach ann; agus gum b’ urrainn dhaibh cumhachdan a dh’fhaodadh a bhith a dhìth orra a thoirt do dhaoine eile gus daoine a thuineachadh air fearann far am b’ àbhaist do dhaoine a bhith a’ fuireach.
Tha seo uile mar cheum eile san iomairt aig Fearann Coimhearsnachd na h-alba gus cumhachd is spionnadh a thoirt do choimhearsnachdan dùthchail ann an Alba. Tha iad cuideachd air a dhèanamh follaiseach gum faodadh seo, ann an dòigh, car a chur ann an sgeul nam fuadaichean le bhith a’ tilleadh dhaoine gu pàirt dhen fhearann a chaidh fhàgail gun daoine ann agus mar nàdar de dh’fhàsach. Tha a’ bhuidheann cuideachd a’ faicinn cothrom an seo feumalachdan an t-sluaigh a thoirt fa-near an lùib laghan planaidh, a bharrachd air cùisean àrainneachd is eile.
A rèir neach-labhairt bho Fhearann Coimhearsnachd na h-alba, “Chaidh tòrr ùine a chur seachad a’ mapadh ‘fearann fiadhain’ mar a chanar ris, ach bu chòir beagan ùine a chur seachad a-nis a’ clàradh mapa den dualchas a tha Alba air a chall nuair a thathar a’ beachdachadh air leasachaidhean san àm ri thighinn. Feumaidh sinn cothromachadh fhaighinn san deasbad mun tìr agus bu chòir do chothroman a bhith ann tìr a bhios beò a chruthachadh far am bi daoine nam pàirt cudromach dhith.”
Eadar gach raon glèidhteachais aig muir is air tìr, ’s dòcha gu bheil cuid a choimh ears nachdandùthc hail a’ faireachdainn gu bheil gach nì mun cuairt orra fo dhìon ach iad fhèin. Mar a tha soilleir do dhuine sam bith aig a bheil eòlas air sgìrean dùthchail air a’ Ghàidhealtachd agus sna h-eileanan, tha talamh airson taigh cho prìseil ris an òr. Nam biodh dòigh ann talamh a chur fo shea lbhchoimh ears nachd an air am b’ urrainn dhaibh taighean a thogail, cò nach cuireadh fàilte air sin?
’S fhiach a chuimhneachadh nuair a thig e gu cuid mhath den fhearann air am bi daoine a’ smaoineachadh mar fhearann fiadhain, mar fhàsach, gun robh daoine a’ fuireach ann aig aon àm. Feumar fhathast aire a thoirt do nàdar is bòidhchead na dùthcha, gun teagamh, ach faodaidh taighean is daoine a bhith nam pàirt den tìr sin.
Chan eil fhios agam mu bhith a’ cur car ann an sgeul nam fuadaichean, ach leis na tha Fearann Coimhearsnachd na h-alba a’ moladh, dh’fhaodadh e cuideachadh le bhith a’ cur stad air a’ chrìonadh chunbhalach a tha a’ tighinn air an t-sluagh agus air an eaconamaidh ann an cuid a sgìrean dùthchail. Faodaidh daoine a bhith nam pàirt den àrainneachd gun a bhith a’ dèanamh sgrios oirre.
Tha an t-artaigil seo ga fhoillseachadh ann an co-bhuinn ris a’ Chomann Rìoghail Cheilteach www. royal celtic society. scot