Tha sgeulachd nan Oifis Phuist dìreach tiamhaidh
◆ Feumar freagairtean cheart fhaighinn carson a thachair e, le Murray Macleòid
Tha mi fhathast gun am prògram “Mr Bates v the Post Office” fhaicinn, ach gu cinnteach tha mi dol a dhèanamh sin nuair a cheadaicheas an tìde.
Chan eil mòran rudan air telebhisean aig an robh an uimhir de bhuaidh agus e air an luchd-poileataigs agus na h-ùghdarrasan a dhùsgadh às an t-suainchadal airson dèiligeadh leis a’ chùis mar bu chòir.
Leis na tha air a bhith air a ràdh agus air a sgrìobhadh mu dheidhinn, saoilidh mi gu bheil mi eòlach gu leòr air an sgeulachd, ach an dèidh sin, tha fhios nuair a thig an t-àm a choimhead nach bi m’ fhearg càil nas socaire ri linn sin.
‘S e f ìor actair a tha ann an Toby Jones, a tha a’ cluiche a’ phrìomh phàirt. Tha doimhneachd is sgil is tuigse aige, fiù ‘s anns na pàirtean èibhinn a bhios e a’ cluiche. Tha mi a’ coimhead air adhart ri fhaicinn, mas e sin am briathrachas ceart.
Tha e a’ sealltainn cho cumhachdach ‘s a dh’fhaodas telebhisean a bhith, a’ toirt buaidh air poileasaidh poblach le bhith cur na prosbaig air ana-ceartas airson an duine bhig. Chan eil càil a ghluaiseas an luchdpoiileataigs na fearg mòr nan daoine.
Agus gu cinnteach, bha sgeulachdan gu leòr ann – na ceudan mhòr air feadh Bhreatainn. Sin tòrr dhaoine a dh’fhuilig ri linn an cliù a bhith air a mhilleadh le buidheann nach b’ urrainn gabhail ris gun robh an coimpiutair aca ceàrr agus a bha a’ creids' gun robh a h-uile duine a bha sin ri foill.
Bithear an dòchas gum faigh an rannsachadh poblach a tha a’ dol air adhart an dràsta freagairt air carson a bha iad ris an dol a-mach a tha seo, bhon cha ghabh idir a thuigs'.
Ged a tha am prògram air ITV air cuideachadh an cuspair a chur fa chomhair an t-sluaigh, tha fhios gu bheil a’ chùis nas tiamhaidh buileach nuair a tha thu faisg air a’ ghnothach.
Ann an agallamh leis a’ BHBC, dh’innis Anne Quarm, banntrach fear dhe na daoine a bhathas a’ cur as a leth gun robh e ri foill, dìreach cho duilich ’s a bha e dhaibh.
Bha Uilleam Quarm a' ruith Oifis a' Phuist ann am Paibil an Uibhist a Tuath. Bhàsaich e ann an 2012, a shlàinte air briseadh ‘s trom an eallach air às dèidh na thachair. Chaidh cur às den dìteadh aige an-uiridh, 11 bliadhna as dèidh dha caochail.
Cha do choinnich mi fhèin ri Bill a-riamh, ach ‘s aithne dhomh gu leòr a bha eòlach air agus cha robh duine aca dhen bheachd gun robh e idir ris na bhathas a’ cur às a leth. Ach, an dèidh sin, bha a’ bhuaidh domhainn.
"Bha a h-uile earbsa agam ann am Bill,” thuirt Anne anns an agallamh a gheibhear fhathast air eadar-lìon a’ BHBC. "B' e duine onorach a bh' ann, duine ceart.
"Bha e ag obair gu cruaidh. Bha e dìreach uabhasach ga fhaicinn anns an t-suidheachadh san robh e.
"Bhris a shlàinte, agus bha mise fortanach nach do bhris e mo shlàintesa. Ach bha mi dìreach a' cumail a' dol air sàilleibh an teaghlaich.
"Chaill sinn a h-uile càil a bh' againn. Ar dachaigh, 's na gnothachasan. Tha e doirbh a chur ann am faclan dè tha mi dha rìribh a' ciallachadh, ach dìreach nach robh sìon againn mu dheireadh.”
Tha i fhathast gun sgillinn ruadh fhaighinn air ais.