Cothrom caillte eile le plana crìonadh sluaigh
◆ ‘S e a tha a dhith ach gniomh, chan e an tuilleadh faclan, tha Murray Macleoid ag radh
Tha mi creid ‘s nach robh dùil ri mòran nuair a chaidh a ràdh gum biodh Riaghaltas na h-alba a’ foillseachadh plana ùr airson dèiligeadh ri crìonadh-sluaigh anns na coimhearsnachdan iomallach. Ach fiù ‘s aig a sin, bha e tàmailteach cho falamh ’s a bha a’ chùis.
Tha e follaiseach gu bheil iad airson a bhith air am faicinn a bhith a’ dèanamh rudeigin, ged nach eil beachd aca dè, agus an uimhir a dhragh a’ tighinn bhon iomall mu àireamhan-sluaigh.
Às dèidh an fhoillseachaidh a chaidh dhèanamh leis a’ mhinistear Emma Roddick anns A' Ghearsadan Dihaoine ’s a chaidh, ‘s e a chanadh cuid ach: “Innis dhuinn ruidegin air nach eil fios againn,” leis na bh’ aice ri ràdh. Chan e faclan idir a tha dhìth, ach gnìomh agus san t-seagh sin, chan eil mòran ri innse.
Tha an aithisg a’ togail air an t-suidheachadh ann an Iapan a tha air nithean a chur air dòigh airson dèiligeadh ri crìonadhsluaigh anns na h-eileanan aca fhèin, a’ coimhead ri obair na h-àrainneachd, turasachd, foghlam agus a bhith ag obair aig an iomall.
Ach, mar a tha an aithisg fhèin a’ mìneachadh, chan eil e idir soilleir an gabh eisimpleir Iapain a chur an sàs ann an seo ann an Alba.
Dè a-rèist ma-thà? Uill, chaidh £180,000 de dh’airgead fhoillseachadh eadar Earraghàidheal, a’ Ghàidhealtachd is na h-eileanan Siar.
Thuirt Emma Roddick “gum biodh iad a’ coimhead ri stiùireadh ionadail airson nan co-dhunaidhean a dhèanamh a-rèir feumalachdan an t-sluaigh anns na sgìrean aca fhèin”.
‘S dòcha aig an ìre-sa gum bu chòirear leum gu Steòrnabhagh, far an robh Comhairle nan Eilean Siar a’ dèanamh cho-dhunaidhean mu choinneamh a' bhuidseit aca Dimàirt. Bha easbhaidh de £3 millean mun coinneamh, iarraidh mòr airson ùghdarras ionadail beag eileanach.
Aig a’ cheann thall, fhuair iad air a’ chùis a rèiteachadh le bhith a’ lorg £1.7 millean de ghearraidhean ann an seirbheisean agus £2 millean a thoirt às an stòrassàbhalaidh aca.
Chan iad an aon chomhairle anns an t-suidheachadh seo, le tè às gach ceithir ann an Alba draghail nach fhaigh iad air na prìomh dhleasdanasan aca a choileanadh agus rabhadh nach bi e fada gus am bi comhairle a choireigin buileach briste bho thaobh ionmhais ann an ùine nach bi fada.
Thuirt ceannard Comhairle nan Eilean Siar, Pòl Steele, nach urrainn gabhail ris an t-suidheachadh-ionmhais, nach urrainn dha leantainn agus gur e an tuilleadh sheirbheisean a tha a’ dol a dh’fhulang.
Ged a fhuair iad a-mach às an staing le bhith a’ cleachdadh stòras nan sàbhalaidhean, cha mhair seo ro fhada agus gun ach £2 mhillean air fhàgail. Mar a tha cùisean, tha a h-uile coltas gu falbh e aig an-athbhuidseat.
‘S ann anns a’ chotheacs seo a bu chòirear na faclan air crìonaidh sluaigh a’ mhinisteir a mheas agus an cleas gun tig na co-dhùnaidhean a dhèanamh aig ìre ionadail. Leis cho mòr ‘s a tha an roinn phoblach a’ fulang, cò bhios air fhàgail airson nan co-dhùnaidhean sin a dhèanamh, gun ghuth a ràdh mu dheidhinn sporanan gun sgillin ruadh?