Tha cothroman mòr ann an cumhachd uaine
◆ Ach, feumaidh iad a bhith air an roinn a-mach gu ceart, le Murray Macleòid
Tha e furasta gu leòr a thuigse carson a chaidh uimhir de ghàirdeachas a dhèanamh ris an naidheachd g’ eil “port uaine” dhan Ghàidhealtachd air a thighinn ceum nas fhaisge.
Le dòchas gun tèid 10,000 obair a chruthachadh agus teachd a-steach de £3 billean, tha mòran a’ coimhead air adhart gu mòr ris a’ pròiseact seo a thoirt beò.
Fiù ’s dha coimhearsnachdan mar Neig agus Ard nan Saor, a fhuair buannachd nach beag bho ola a’ Chuain a Tuath, ’s e rud mòr a bhios ann, a’ chiad eisimpleir shoilleir mu na dh’fhaodas a thighinn tro chothroman cosnaidh ann an roinn na cumhachd uaine.
Ged a tha am pàirt seo dhen dùthaich air buannachd gu leòr fhaicinn gu h-eachdraidheil, tha iad cuideachd air fulang bhon chrìonadh a tha air a thighinn bho chionn ghoirid, na seann chruinnola a tha nan seasamh nan cnapan meirge ann an Linne Chrombaigh nan eisimpleir air an atharrachadh tha dol a thighinn agus a tha air tighinn.
Ach, dha mòran choimhearsnachdan eile chan eil ann ach an t-seann duan. Nuair a bheir thu sùil air fàs Inbhir Nis, cha chanadh tu g’ eil taic a dhìth agus aig an aon àm tha na coimhearsnachdan nas fhaide a-muigh air an iar a’ fulang le crìonadh sluaigh agus cion chothroman obrach.
’S dòcha g’ eil adhbharan matha carson a tha pròiseact na puirt uaine gu bhith stèidhichte mu thimcheall Linne Mhoireibh is Inbhir Nis – cothrom air cidhichean agus bun-structair eile – ach bu chòir na h-ùghdarrasan a bhith smaoineachadh mu ciamar a thèid na buannachdan a sgaoileadh nas fhaide na crìochan an Eilein Dhuibh. ’S chan eil sin idir mu dheidhinn a bhith toirt an luchd-obrach air falbh bho àitichean eile, mar a tha air a bhith a’ tachairt fad iomadach ginealach.
Fhad ’s a tha port uaine na Gàidhealtachd a’ gluasad nas fhaisge, tha suidheachadh eile a’ tighinn am bàrr nas fhaide thall air an iar.
Tha aon de na tuathangaoithe mara a tha san amharc gu bhith trì mìle bho chosta Leòdhais. Le sin, shaoileadh tu gum biodh còmhradh gu leòr ga dhèanamh leis a’ choimhearsnachd ionadail, ach an àite sin chan eil ach beàrn mhòr far a bheil còir aig fiosrachadh a bhith.
Tha an companaidh a tha air cùlaibh a’ phròiseict, Northland à Canada, ag ràdh g’ eil buannachdan gu bhith ann dhan choimhearsnachd, ach chan eil fhios aig duine cò ris a tha sin gu bhith coltach.
Dhiùlt croitearan ann an Siabost cead a thoirt dhan chompanaidh am fearann aca a chleachdadh son crann aimsir a stèidheachadh agus tha seo a’ daingneachadh nam faireachdainn nach eil an companaidh air gu leòr a dhèanamh son daoine a thoirt leotha.
Dìreach mar port uaine na Gàidhealtachd, tha e a’ sealltainn cho cudromach ’s a tha e gun tig na buannachdan a sgaoileadh a-mach gu rèidh agus gu cothromach, gu h-àraidh dhan fheadhainn is feumaiche air. Ach, mar a tha cuisean a’ coimhead, cha deach na leasanan ann an eachdraidh idir ionnsachadh.