贏粒糖‧輸間廠

●習主席伉儷來港慶回歸，他是國家最高領導，接待地上最強領袖，特區自然以最高規格款待。警方保安嚴密，做到萬無一失，事關主席此行，不僅係全港的事，更是全世界的事，不惜調動所有警力，四圍封路，鐵馬縱橫，好多駕車人士，叫苦連天，大歎諸多不便。我就以逆思考觀察，以不變應萬變，當警方動員全力保安，其他「抄牌」小事就會放下，給我鑽個空子，你以為不便，我就發現了方便之處。習主席來港前後四天，我就大安旨意，駕車去到邊泊到邊，發揮我貪方便，周街泊的駕車精神。

平時我就喜歡和警察對賭，這幾天賭得更大手筆。好似到工廠區開會，橫街小巷照泊，果然，未有中招；晚上去鬧市吃飯，車子停在路邊，一律以膽博膽，如果以賭馬術語來說，一連四日，每押皆勝，好似中了一條四重彩。我還發覺，抄牌既少，捉快相也無。平時在荃灣出九龍的青山公路，經常有超速影相出現，自從宣布習主席來港，都無部署捉超速。果然，又被我估中。連日高速下山、周街泊車，沾沾自喜之際，就樂極生悲，在荃灣龍翔道往觀塘方向，高速駕車之際，忽然，車頭強光一閃，驚魂乍現，我被拍照，高速捕獲。百密一疏，警方沒有人手捉飛車，可以機械代勞，一哥連日開盡所有「超速影相裝置」，真係兵不厭詐，四日以來，跟警方對賭，雖然沒收到違例泊車，卻被連拍兩張快相，贏粒糖，輸間廠。慘敗。自食苦果。