Mari yehuori
11. SARUDZA vananyanduri vana vari muna Mutakunanzva Wenhetembo vanonyora nezvedingindira rehuori. Zvino chitsanangura zvinotaurwa maererano nehuori mudetembo rega rega rawasarudza. [25]
Ndasarudza nhetembo dzinoti; Kumaruva kwedu naAlouis T. Sagota, Mutsvene ndiani? naToyindepi M. Musiyiwa, Kuvachairi vemakombi naNyevero Maruzani uye Chiremera chakatiremera kubva kuna Francis Matambirofa.
Mudetembo raAlouis T. Sagota rinonzi Kumaruva kwedu, anoti vamiririri venharaunda yavo vari kuita huori kuburikidza nekutsvaga mari nemazita everuzhinji vanotambudzika sepaanoti, “Vationa mifananidzo yedu ketye votora kuti vagonopemha kuwedzera pfuma yavo nehwedu urombo.”
Nyanduri anoti rubatsiro rwavanopihwa sevanhu venharaunda harwusi kusvika mumaoko avo sepaanoti, “. . . netsitsi vobudisa dzisingasviki mangwana pasuro.” Nyanduri anoti zvinhu zvenharaunda zviri kudyiwa nevamiririri venzvimbo chete sepaanoti, “Pasuro dzinoenda kwasabhuku, kwadzinogoverwa nekuperera.”
Mudetembo rechipiri rinobva kuna Toyindepi M. Musiyiwa rinonzi Mutsvene ndiani?, anoti vana vechikoro vave kuita mhirizhonga pamusoro pehuori huri kuitwa nevatungamiri sepaanoti, “Chokwadi iri idenda rinoodza musha.”
Kubva muna Kuvachairi vemakombi, Nyevero Maruzani anoti vanhu vemutemo vari kupihwa vharamuromo mumigwagwa sepaanoti, “. . . nechiokomuhomwe chenyu yenyu miromo yavharwa.” Nyanduri anoti huori huri kuita kuti mhosva dzevanhu vanofamba nemakombi dzitsikwetsikwe sepaanoti, “Mhosva yomutyairi yavharwa nemari yefufuro?” Nyanduri anoti huori huri kukonzera kuti vanhu varasikirwe neupenyu mumigwagwa sepaanoti, “Vanhu vose vari mukombi vofira mari yefufuro?”
Francis Matambirofa mudetembo Chiremera chakatiremera, anoti vemutemo vava kusiya vanhu vane mhosva nekuti vanenge vachipihwa mari sepaanoti, “Mapurisa, haiwa, ane mari nyangoikoromora, mugonyei?”
Nyanduri anoti mukuferefetwa kwedzimhosva mave nehuori sepaanoti, “Nhasi vafeyi nevafeyewi unovawana vachiravana mikombe mumabhawa.”
Nyanduri anoti nhasi uno mabasa echiokomuhomwe aishoreka kare awandisa uye zvava kunetsa kuti abve muvanhu sepaanoti, “. . . uori nokuparara kwerudzi zvapfunya chisero.”
12. Vananyanduri vari muna Mutakunanzva Wenhetembo vanofarira kunyora vachinyunyuta. Sarudza nhetembo shanu dzakanyorwa navananyanduri vakasiyana ugotsanangura kuti vanonyunyuta nezvei munhetembo yega yega. [25]
Ndawana nhetembo idzi; Ndakushayai amai naBetty Mpofu, Tinoda ruyamuro Mwari naNorlan Makwarimba, Ndinongonzi nyarara naAbel Mauchi, Mwana wanhasi naTineyi Chipise uye Ndiri chiiko mwanasikana? naPeter Marimi.
Mudetembo raBetty Mpofu rinonzi Ndakushayai amai, anonyunyuta kuti amai vake vave kukoshesa kutsvaga mari vachitadza kumupawo rudo rwaanoda sepaanoti, “Iyo mari chaiyo ingaita amai vangu here?”
Nyanduri anonyunyuta kuti asuwa rudo rwamai vake sepaanoti, “Ndinoshuvira kubata rwaamai vangu ruoko.”
Kubva mudetembo raNorlan Makwarimba rinonzi Tinoda ruyamuro Mwari, anonyunyuta achiti chipfambi chanyanyisa sepaanoti, “Takomberedzwa neruzhowa rweupombwe.” Nyanduri ari kutsutsumwa kuna Mwari achiti vanhu vava kupfeka mbatya dzinosiya miviri pachena sepaanoti, “Zvipfeko zvopfekwa kwave kushambadza zvakavanzika.”
Detembo retatu nderaAbel Mauchi rinonzi Ndinongonzi nyarara, anotsutsumwa nekuti kushaya dzidzo kwake kwava kuita kuti asave nechiremera sepaanoti, “Kusadzidza kwandiparira, handina rukudzo rwandinopihwa panyika.” Nyanduri anonyunyuta kuti ari kushanda zvakapfurikidza sepaanoti, “Nhasi basa hariperi kwandiri masikati nousiku, ndichatsvukira.”
Mudetembo rinonzi Mwana wanhasi, Tineyi Chipise anonyunyuta pamusoro petsika dzemazuva ano dziri kuita kuti vanhu vasaremekedzane paukama sepaanoti, “Vatezvara voitwa zvavo babamudiki.”
Nyanduri anonyunyuta nekuti mazuva ano pwere dzava kutsvagawo bonde sepaanoti, “Bonde nhasi rozibwa nechana chine mukaka pamhuno.”
Ndinopedzisira nedetembo raPeter Marimi rinonzi Ndiri chiiko mwanasikana?
Nyanduri anonyunyuta nekusawaniswa mukana wakakura wekuti aende mberi nechikoro sepaanoti, “Chomwanasikana chikoro chinoguma ndisina chitupa.” Nyanduri anonyunyuta nekugarwa nhaka nemunhu akura zvakanyanyisa kumudarika sepaanoti, “Kana yauya nhaka, chigaramapfihwa, ndinopiwa dana rine zera nababa vokubereka.”
MABURITSIRWO munyaya:
VANHUKADZI:
Vanhukadzi vanosanganisira vasikana navanamai vakaroohwa kana chembere dzechikadzi dzatinoona dziri munyaya. Vanhukadzi vari munyaya iyi vanoburitswa nenzira dzakasiyana-siyana.
◆ Vanhukadzi vanoburitswa vachitapwa nevanhurume sezvinoitwa Beaula anopambwa nembavha dzekuba mari kuC and T Private Limited.
◆ Vanhukadzi vanoburitswa vachiurayiwa vasina mhosva — zvinobuda nekuurayiwa kweshamwari mbiri dzaBeaula idzo dzinofira mutsaona yemotokari dzichibva kubasa. Izvi zvinonzi zvakakonzerwa nembavha dzekuba mari kuC and T Private Limited.
◆Vanhukadzi vanoburitswawo vachishanda mabasa epamusoro — Beaula anenge achishanda semukuru wemaodhita aiongorora mafambiro ainge aita mari paC and T Private Limited.
◆ Vanhukadzi vanoburitswa vachishungurudzwa nevanhurume kuburikidza nekurohwa mumhirizhonga yemudzimba – tinoona mudzimai anosangana naStanley achienda kuCentral Police Station achirohwa mbama nemurume wake pamberi pevanhu pamwe chete nekurambirwa vana achinzi vaive vekusango.
◆ Eve anomanikidzwa kubvisa pamuviri pakanga pakurisa chaizvo naSolo sezvo akanga asingapatarisire — dai akaramba aisazopihwa mari yekuterera imba yaaigara neyekutenga chikafu.
◆ Mudzimai waSolo anosangana nedambudziko rekutorerwa murume naEve pamwe chete nekurohwa nashangu naEve. Solo wacho anozobatsirawo musikana waaidanana naye muchivande, Eve, kurova mudzimai wake.
◆ Vanhukadzi vanoburitswazve vachirwisana — tinonzwa kuti Ropa akanga aruma chigunwe chamainini vake achiita sekunge achachikwachura.
◆ Vanhukadzi vanoburitswa munyaya vari vanhu vasingayemurane — Ropa anotuka mainini vake achiti vasikana vebasa havana kudzidza uye havana chavanoziva. Ivowo mainini vaRopa vanodzoserawo kumutuka vachiti idofo risingagoni zvechikoro pamwe chete nekuda kumutema nemutambo uzere tsvina yemwana.
◆ Vanhukadzi vanoburitswa vachiedza kurwisa nyaya yekutsikirirwa kwekodzero dzavo kuburikidza nekuramba mhirizhonga yese yemudzimba — tinoona panorohwa munhukadzi mbama pana Angwa Street nemurume wake vanhu vachibva vatanga kuratidzira vachishoropodza chiitiko ichi kunyanya vanhukadzi. Panopondwa Eve vanhukadzi vanoonekwa vari pachivanze vachiratidzira.
◆ Vanhukadzi vanoburitswa vachiita zvechipfambi mumabhawa senzira yekutsvaga mari — tinoona Esinati naMasi vari kubhawa rePlaza Oriental vachivhima varume vekurara navo kuti vapihwe mari.
VANHURUME:
◆ Vanhurume vanoburitswa vaine hutsinye — tinoona mbavha dzekuba mari paC and T Private Limited dzichikonzera njodzi yekufa kweshamwari dzaBeaula dzaibva kubasa.
◆ Vanhurume vanoonekwa vari mhondi — tinoona Monya achienda kunouraya gadhi wepaSearing Heights, Samson. Anourayazve Eve ndokusiya amukanda mutabhu muzere mvura akamubaya nebanga kumusana.
◆ Vanhurume vanobuda vari mabhinya — tinoona Monya achibata Eve chibharo asati amuuraya.
◆ Vanhurume vanobuda vachiita huori — tinoona Samson achipihwa chiokomuhomwe navanaVheremu ndokuvatendera kupinda paSearing Heights asina kunyora mazita avo mubhuku rainyorwa vaenzi. VanaSolo vanenge vachiendesa fodya kunze kwenyika zvisiri pamutemo. Vheremu nevamwe vaaishanda navo kubazi rezvemari kuC and T Private Limited vanenge vachiba mari nechinyoreso. evanhukadzi nevanhurume