‘Bhadharai mitero’
MUDZIMAI wekwaSeke, uyo ari kurarama neutachiona hweHIV, akabatwa nemhosva nedare reko yekuyamwisa mwana wemuvakidzani wake ndokupihwa chirango chekugara mujeri kwemakore 15.
Mupari wemhosva anoti akaita izvi nekuda kwekuti minyatso yemazamu ake yaiswinya.
Mutongi wedare reChitungwiza Magistrates’ Courts — Estere Chivasa — akabvisira musungwa uyu, Chipo Thandi ( 30) wemubhuku raChanakira, makore mashanu pachirango ichi paine chitsidzo chekuti haafanire kupara imwezve mhosva yerudzi urwu mukati memakore mashanu anotevera.
Muchuchisi Loveti Muringwa akaudza dare kuti nomusi wa12 Kurume gore rino kwaChanakira, Thandi akaita zvinhu zvisina hanya apo akayamwisa mwana asiri wake mukaka achinyatsoziva kuti anorarama neutachiona hweHIV.
Mwana akayamwiswa uyu mucheche. Thandi akabvuma mhosva yake yekuyamwisa mwana wevaridzi pamwe nekuti ari kurarama neutachiona hweHIV.
“Mhosva idzi ndinodzibvuma. Ndakayamwisa mwana uyu kamwe chete mushure mekunge ndanzwa minyatso yangu ichiswinya uye ndinozviziva kuti ndiri HIV positive,” anodaro.
Panguva yaakange ari kutongwa ari mudare, Thandi akambonyepera kunge munhu ave kurasa njere izvo zvakaita kuti mutongi aite kuti anovhenekwa nemachirema maviri anoona nezvemashandiro enjere asi akaonekwa kuti munhu ane dzakakwana.
Amai vemwana uyu (zita tinaro) vakaudza dare kuti pazuva iri munguva dzemanheru, vakakumbira Thandi kuti avabatire mwana wavo apo ivo vainogeza.
“Pandakapedza kugeza ndipo pandakaona Thandi ari mushishi kuyamwisa mwana wangu. Paakandiona, akabva ajamba kubva pabhaketi raakange akagara achibva apinda mumba make ndokuchinja mbatya dzaakange akapfeka.
“Ndakamubvunza kuti sei anga achiita izvi, achibva atanga kuzviramba ndichibva ndanomhan’ara kumapurisa pamwe nekuendesa mwana wangu kuchipatara nekukasika uko akanopihwa mishonga yekudzivirira kubatira zvirwere,” vanodaro amai vemwana uyu.
Thandi akatongwa nemhosva yeAggravated Indecent Assault as Defined in Section 66 (1) (b) (i) of Reform Act Chapter 9:23 Indecent Assault. KAMBANI yeTax Matrix yakaparura bhuku idzva rinove rechitanhatu rinokurudzira mabhizimisi madiki kuti abhadhare mitero nedonzvo rekusimudzira upfumi hwenyika.
Bhuku iri rinonzi VAT Concepts and Practice 2017 Edition. Kambani iyi inobatsira zvakare vadzidzi vanenge vabudirira pabvunzo dzeA-Level nemabhezari ekuti vakwanise kuenderera mberi nezvidzidzo zveAccounts.
Achitaura pakuparurwa kwebhuku iri, Marvellous Tapera, uyo anove munyori ari zvakare managing director weTax Matrix anoti zvakakosha kuti makambani madiki abhadhare mitero inodaidzwa kuti “tax”. Mabhuku edu anoshandiswa kazhinji nemakambani mukuumbiridza mabhajeti awo uyewo makoreji nemayunivhesiti akadai seUniversity of Zimbabwe, Midlands State University, Women’s University in Africa neLupane University. Gore negore tinopa vadzidzi vanokwana 8 mabhezari vanenge vapedza gwaro reA-Level avo vanogona chikoro vatinodzidzisa Accounts pakoreji yedu yeTax Matrix Academy kwemakore matatu, tozovapa zvitupa zvemaDiploma,” anodaro.
Anoti vanoshanda pamwe chete nebazi redzidzo yepamusoro, sainzi nekusimudzirwa kwemichina mukuvandudza dzidzo, kunyanya vakatarisana nechidzidzo cheAccounts.
“Donzvo redu nderekubura nyanzvi neshangwiti dzinoziva kutarisa mabhuku emari inobuda munyika pamwe nemumakambani. Senyika, tinofanirwa kuziva kuti zvakakosha kuve nezvigadzirwa zvemuno tozvisimudzira pachezvedu nekuti mari yatinobhadhara kutenga zvinhu kunze kwenyika nekuzviunza muno yakawanda zvakarewo zvinova zvinodzosera budiriro yenyika kumashure,” anodaro.