Misande ngechiNdau

NGATICHIREKETA ngemusande wedu wekugumisira nyamashi. Yaashwe njonjo mbuya yanyimwe doro. Zvidhakwa zvinochiziya kuti zvinorwadza yaemho kunyimwe doro apa usina kana peni mumbudu. Aribviri ngekutapira doro kune awo ane aro.

Kana munhu amwe doro zviyana, doro rakhona rine mishando nemisande yaro kana warichocha kugume mumusoro. Rinoti madziyo ngemadziyo, weti, kurutsa, chiambiro nekunyenge akadzi eantu. Yeeshe iyi misaikuzwa yedoro asi wedoro ngewedoro, unofa ndiro. Wechihure ngewemahure, unofa ndicho chihure chakwecho.

Nemukondomera uyu wakati kuuya nyamashi. Ndapota hangu, kuti mwamwe doro kana kuti mhamba pachiManyika, musashaishe kumwe mhambayo hai. Hamba nawo chakanaka murandu wedorowo! Gama rinoti kuashwa – rinobhuye kuti kuzorodzwa akhiti woye.

Njonjo igama rechiNdau rakabamba yaemho. Apa rinobuya ngeweti kana takaringirana nemusande wetinawo pano nyamashi. Tinarohe gamero rekuti njonjo reibhuye kuti mbeu. Njonjo yepwa njonjo yemuriwo wetsunga. Njonjo yemungoza, rambe rambe zvakadaro. Saka apa ndaakuchiti badubadu pikupiku ndeipedzise.

Teeshe taanayo pikitsha yechiro chetinoreketa ndicho.

Munhu wamwe doro uyana, haabviri ngekutsvukise njira kwende kuweti. Kunokuno wamiruka koorashe mvura. Saka amweni akati ngatiikhaurise mbuyayi ngekuinyime doro. Aya amweni ochoorimwa doro riya mbuya iya yakaringira kudai.

Kunokuno awo, kuchiravha koorashe mvura. Kunokuno apetukahe kuchiravha koorashe mvura. Ino mbuya iya yanyimwe doro yakandoti fututu yakatsamwa asi yaashwe chiro chimwe. Haisisimwo akadi mumutimbirawo wekuti kunokuno yarumba kuchakati tende iyo!

Kushata kwezvimweni, kunaka kwezvimweni. Tapetukahe teireketa nemuti mukanwa teiti mweisarai. Iwai nevhiki rinodakadza rakadzodzwa ngemutauro wechiNdau. Ngatisambe ndicho, ngatiite chekucherera nemabiya tipedze nyota nemathoisa ndicho.

◆ Pane angade kureketa naPenyai, ngatidhibane pa 0772 332 645/ ◆ 0712 948 959. ◆ Ndini Chomunorwa Mukayana uno ku Birchnough ndinodakara yamho ngekurumbidzewo mutauro wedu.