Madimikira ngechiNdau
NDAUWE ndauwe! Ngatidhibanehe pabadla nyamashi teirekete zviro zvedu. Ngatibongehe Marure watihine mukana uno wekupurumuka nekupoterwa ngezuwa takamhoryoka mweya nenyama. Ngatisariyarwa akadi kumboti dzunzunyare teibonga Marure ngechipo ichi cheupenyu chetinacho ngemukuwo wenyamashi.
Tinobonga ngazvibongwe hai. Zuro ndaireketa naMbuya Enesi Tuso pafoni ndeiti, ndichagumeyo vhiki rinouya iro mumbotibhuire ngano. Atidi kuti zvirozvi zvife ngesimanjemanje yenyuyo yakaguma zuro.
Vhiki rakapera takareketa ngemisande zviya. Tikati maChina haabviri nawo ngemisande kai kwawoyo. Tisati taringire mberi, ngatimboringire sure teisheka teiti: A journey of a thousand miles — it begins with a single mile. Eya Mandau haabviri nawo — anoti tinosara nawo ere pachingezipo. Ndicho chingezi chacho chakauya nemangezi. Unoshanda nezviripo kuti urizwisise zuwero. Nyamashi tiri pamagobo emadimikira.
Chi ny in i chi nozwi dimikira kana kuti madimikira. Dimikira mutauro wakangwara uyehe wakafishika yaemho kana iweiwe usikazi kubeukirwa ndiwo madimikira akhona.Sekuru angu anobara mai amai angu, anowa ndiwo aMushiri, aiti chingezi chinode kungwarangwara muzaya. Aidaro eireketere inini, nangokudaro mazwi awo akandidetsera yaamho.
Ndeizviringira nyamashi uno, tsekuru aibhuye gwinyiso. Dimikira mutauro uya wetingati une chisana kana kuti chibhende. Munokone kurekete ndaa yenyu yeipera, zvipusha zvisina zvezvazwa, kana gama rimwe haro remutombo kudai. Kuramba wakabairire dimikira ngedimikira hai. Nyakuyaiya unokone kutosheka apaapo asi pasina kana chimwe chaazwa.
Bofu anditi rinosekawo ere akhiti kana rikazwe anorekete mityatya yawo inonga yaana Parrafin, Mukadota, Mutirowafanza kana kuti amweni edu emityatya emhiri kwenyika akadai ndiana Trevor Noah wekuSouth Africa naBilly Cosby kuAmerica. Mazina ndiwo akawanda eanhu anoreketa nekupona ngemare yemityatya – atingaapedzi. Chinonaka chinorekwa.
Dimikira chiro chinoshekesa asi unofanire kunga wakasambe kuhope. Kana uri muNdau wemene, unofanire kunga watozviona kuti hondo iya yemadimikira ndatotangana nayo pamutsara uyo wendasiye paderapo. Waizozwa baba angu oti — apo mukura waapo paya, kunyazi hake eiedze kutamba nemvura nemakhasi eundumure. Mukura hauna fejafeja. Tinayo ngoma. Rowe ngoma Duzura iwe! Kana weihamba naro doodzi racho wakayaiya weirizwa, unozwe kuti apa paane antu ari kurekete zviro zvawo zvakaseja. Zvaa zviro zvemene zvakaphucuka. Tiri kuiphutunura zviyani zviyani. Munoti pane petinorumbirira ere. Nyamashi isoto, apana chekurumbirira, kubanze kwekuende kusoto kooirikidza musiki wedu Marure.