Muporofita wekumedzwa nebako achiri muchipatara
MUPOROFITA wekuGuruve — wekuda kuwedzera masimba ake nekunopinda mugomo rinoyera kuChiweshe umo akazodhonzerwa mubako kana kuti ninga nezvinhu zvaasina kuziva kuti zvii, musiwo webako uchibva wavharika iye arimo — achiri kurapwa muchipatara cheParirenyatwa Group of Hospitals, muHarare.
Madzibaba Tinashe Tinapi (30) wechechi yeJohane Masowe weChishanu uye achibva kwaJeke, kuGuruve, anonzi akavharirwa mubako regomo reChiwonde, umo akarara husiku hwose achibongomora kuchema sezvo ainge akamanikwa pakati pemabwe ebako guru remo.
Muporofita uyu akazonunurwa nevagari vemunzvimbo iyi zuva rakatevera mushure mekunge vatanga vaita chivanhu uye akakuvara zvikaita kuti aendeswe kuchipatara.
Mudzimai waMadzibaba Tinashe, Madzimai Esnath Tamanikwa (25) — uyo akataurwa naye panhare ari kumusha kwavo kuGuruve —anoti murume wake achiri muchipatara cheParirenyatwa Group of Hospitals umo ari kurapwa.
“Ini ndiri kumusha izvozvi, asi ndavasiya vari nani — vachirimo muchipatara. Ndichaona kuti ndingatsvage mari rinhi kuti ndinovaonazve. Chirwere chaicho chavari kurapwa handizive semunhu akaita nguva ari mubako vakambandidzirwa nematombo makuru imomo,” anodaro Madzimai Esnath.
Anoti murume wake aiva negemenzi apo akabva kumba kwavo asi harizi kuonekwa kuti rakafamba sei.
“Hongu, vaiva negemenzi pavakaenda kumakomo aya, iro risiri kuonekwa. Hatizive pamwe rakasara mubako kana kuti rakabvaruka,” anodaro anodaroMadzimai Madzimai Esnath.Esnath
Muporofita uyu paakanunurwa kubva mubako iri mushure mekuitwa kwechivanhu, akatanga kuendeswa kuchipatara cheConcession uko akazodarikidzwa kuParirenyatwa.
Zuva chairo rakapinda madzibaba uyu muchipatara hatina kuriziviswa.
Zvisinei, Madzimai Esnath anoti murume wake ave kuda kusvitsa masvondo maviri kana kudarika ari muchipatara.
Vagari vekuChiweshe vanoti gomo iri rinoyera zvikuru uye haribvumirwe kupindwa nevamwe vanhu kunze kwevanoita zvechivanhu chete nevanopira mashavi nemidzimu.
Mambo Makope, VaJacob Mapirinjanja, vekuChiweshe vanoti muporofita uyu akafumura dunhu ravo pamwe nechivanhu uye kana achinge abuda muchipatara vanoda kumushevedza kudare ravo.
“Takamirira kuti arapwe abude. Asi hurwere hwake haudi muchipatara, anofanirwa kuenda kuchivanhu okumbira ruregerero kumasvikiro nemidzimu obvisa mombe nembudzi zvekuteta nyika yedu nepasi.
“Akabuda ndichataura namambo vari munzvimbo yake yeGuruve tomuranga pachivanhu. Vamwe vanamati ava nemaporofita vave kushereketa zvikuru nekuda kuromba kuti vawane masimba,” vanodaro.
VaDington Chikwekwe (42) vekuChiweshe kwakare vanoti muporofita uyu anofanirwa kunobatsirwa kuchivanhu pane kungoramba ari muchipatara.