Miriwo yedu paChiNdau

NDAUWE ndauwe! Tinobonga ngekukumanahe mugore rino idzva takagwinya mweya nenyama. Ngatimboti dzunzunyare teibonga Marure ngegore idzva iri. Amweni edu akakorere kuambuka, saka ngatibonge yaamho.

Nyamashi tinode kubhuya ngemiriwo yedu yetinorya paChiNdau.

Ngatirekete teiti apa tine gusha, guku, mutikiti, mutsuutsungu. Miriwo yetinoreketa ndiyo iyi tisairingire pashi akadi. Miriwo yakabamba yaemho, uye inorape hosha dzimweni dzetisingazii, kunyanya guku.

Miriwo mizhinji yetiri kuphanda ndiyo inonyanye kuoneka munguwa dzeziyenza, kunyazi hako amweni edu anonga ane matoro anokone kuwa nayo ngemukuwo weChirimo. Pamutikiti apa tine mudondo. Mudondo ndiwo uya une mashakani aya ane maaramaara machena padera pawo. Unoitawo matikiti asikabviri ngekunaka akadi.

Kwozoitawo umweni wacho une shakani risina ruara. Kune umweni mutikiti unozwi musathanina. Uyu mutikiti unonaka yaemho asi aubereki matikiti anoryiwa akadi. Unokone kugare gore reshe uripo mweirya, kunyanya kumatoro. Dikiti racho rinonga rine nhikiti dzacho asi ariryiwi.

Ngatirekete ngegusha. Kune gusha riya remashakani madoko nerine mashakani makuru. Iri rinozwi gusha pfumo. Gusha rinonyanye kudakarirwa ngeanhu ngere manyanhanda, gusha rine tsango mukati. Ukariti chekecheke, uye zvimatimati zviya zvekuputisira pfee, aiyawo, unotshaye gotsi weiti imbwa aribviri. Ngatiende mberi teireketa ngeguku. Amweni anoriti nhungumira kana kuti tsine. Guku naro aribviri, uyehe mutombo rinorapa. Nguwa yetinayo ino ndiyo yeguku remumaminda. Unoribeke muchikari rokwata, womimine mvura yekutanga neyechipiri, wapedza wochikandire dimati neonyeni yacho kuzozwahe.

Topedzisira ngemutsuutsungu. Ndiwo uya unobereke muchero unozwi mburuuru, tudoodori tutema tusingabviri nathwo ngekunaka. Sadza rinohamba ngemurandu waro kana rine muriwo uyu. Unowawirira zvine zera, kunaka kwendimu kuwawirirazve akhiti. Ngatimboema pano, atei takumanahe vhiki rinouya.