Christmas box... TSVINA YEMUNHU IZERE
NYOKA dzinosvika 40 — shato nemhungu — dziri kugara mumusha waShirichena, kwaNyamweda, kuMhondoro, inova nyaya yakonzera veruzhinji veko kugara vakabatira hana dzavo mumawoko nekutya.
Zvikara izvi zviri kusanganisira nyoka hombe mbiri dzinoti shato inova ine vana 38 nemhungu inonzi ine musoro wakakura kunge wegarwe.
Nyaya iri kunetsa vanhu veko ndeyekuti mhungu neshato inyoka dzisingazivikanwe dzichiwirirana zvekusvika pakugara pamwe chete.
Kwayedza yakashanyira musha uyu svondo radarika ikawana nyoka diki dzakazara dzakaita dutu muguru dzimwewo dziri mumakwenzi.
Nyoka idzi dziri kuwanikwa pamusha wava dongo apo pakatamwa nemumwe muzvinabhizimisi aiva nechitoro paDzumbunu ikoko.
Muzvinhabhizimisi uyu anonzi akangotama zvisinganzwisisike ndokuenda kusina anoziva uye asina kana kuoneka.
Sabhuku Shirichena, VaWilson Shirichena (70), vanoti nyaya yenyoka idzi iri kuvanetsa zvikuru.
“Nyoka idzi dzakatanga kuonekwa dziri mbiri — shato nemhungu hombe
— mwedzi mishanu yakadarika. Shato diki takazodziona mumwedzi waGumiguru wakadarika uyu,” vanodaro.
Vanoti vari kutyira kuti nyoka idzi dzichaguma dzodya zvipfuyo zvakaita sehuku, mbudzi nemombe kana kuruma vanhu.
“Ini handizive zvangu kuti nyoka idzi ndedzevaroyi here kana kuti ndedzaMwari. Chatinongoda bedzi kuti dzibviswe mumusha muno,” vanodaro sabhuku ava.
Nyoka mbiri hombe dzinonzi dzakareba mamita anodarika mana uye dzakafuta zvikuru.
Sabhuku Shirichena vanoti nyaya yenyoka idzi vakaisvitsa kwaMambo Nyamweda, VaClaudious Mandaza, avo vanonzi vakakurudzira kuti dzisauraiwe.
Zvakadai, Mambo Nyamweda vanoudza
Kwayedza kuti nyoka dzeshato dzine chekuita nechivanhu kubva pasichigare.
“Vanouraya shato mudunhu rangu aiwa, tinopedzerana vanosanganawo nezvirango zvakakodzera,” vanodaro mambo ava.
Mumwe mugari wemumusha uyu, VaTotamirepi Mutamiri Taruvinga (50), vanoti nyoka idzi dzagara dzichionekwa munzvimbo iyi kubva kare.
“Pamba pangu pakambouya shato hombe ichida kudya matoki ndikaiisa musaga ndokunoisiya mugomo iri mhenyu nekuti ini handitye nyoka, idzo shato hadzina hasha nevanhu,” vanodaro.
Vanoti mumaguru ari kugara nyoka idzi aimboonekwa muchipinda majerenyenje ayo anofungirwa kuti akadyiwa nenyoka idzodzi.
Madzibaba Joramu Nyikadzino (33), uyo anove muporofita anogara mumusha uyu achipinda chechi yeJohane Masowe Nguwo Tsvuku, anoti nyoka idzi dzinogona kunge dziri dzehuroyi nekuti hakuna mhungu neshato zvinogara pamwe chete.
VaNdogo Kawonde (56) vanoti nyoka idzi dzinowanzoonekwa kubva kuma10 dzemangwanani kusvika kumasikati apo dzinenge dzakasangana hombe nediki.
“Ichi chiitiko chinoshamisa zvikuru nekuti unoona hombe dzacho dzakaita hata kutoenzana nematombo aripo, shato diki dzakakwira pamusoro pehuru dzichiita kunge dzakaberekana,” vanodaro.
Nzvimbo ine nyoka idzi iri padyo nerwizi rwaChemukaka.
Mukushi wemashoko kubazi reZimbabwe Parks and Wildlife Management Authority, VaTinashe Farawo, vanoti chikwata chevashandi vekubazi ravo chakanochera ndokubata nyoka 32 nemusi weChishanu wadarika ndokunodzisiya kumasango kwadzinochengetedzwa zvakanaka.
Vanokurudzira veruzhinji kuti vasauraye nyoka, zvikuru shato idzo dzavanoti dzinochengetedzwa nemutemo wenyika.
“Vanhu vakaona nyoka, ngavatishevedze todzitora kunodziisa kwadzinokodzera kugara kwete kudziuraya,” vanodaro VaFarawo.
Mwedzi mishoma yadarika, kwaRukweza, kudunhu reRusape kwakaonekwa shato dzakawanda idzo dzaipota dzichibuda mumaguru adzaigara dzainotsvaga zvekudya sesadza nemapfupa zvinoraswa nevana pachikoro chekwaRukweza Primary. Maitiro enyoka idzi akashamisa vagari veko zvikuru uye dzinonzi dzakanetsa vashandi veParks kuti vadzibate.
Mumusha weHopley, muHarare nguva pfupi yadarika makaonekwa zvakare mikweshwa yeshato idzo dzakazobatwa nevebazi reParks and Wildlife Management Authority.