Akatyorerwa gumbo redhiyo yemubhawa

KUDZIMA redhiyo yairira mumhanzi mune rimwe bhawa riri mumusha weRugare, muHarare, kwakazoita kuti mumwe mukadzi atyoke gumbo apo akasairirwa nemumwe murume zvichitevera botso rakamutswa nemaitiro ake.

Trymore Mavhunga wemuRugare imomo akamiswa pamberi pamutongi Josephine Sande nemhosva yekurova muvakidzani wake, Tarisai Zheke (33), uyo anogara kuBF Nyashanu Street, muRugare mekare.

Mavhunga akapihwa bhero re$50 uye akanzi adzoke kudare nomusi wa30 Ndira. Zheke anonzi akadzima mumhanzi wairira paredhiyo yemubhawa panguva iyo Mavhunga aiva mushishi kunakirwa nawo zvikaita kuti pamuke bongozozo.

Muchuchisi Sebastian Mutizirwa akazivisa dare kuti nomusi wa15 Zvita 2017 kuma9 dzehusiku, Zheke aiva mubhawa rinonzi Mushazhike Beerhall, kuRugare, apo akatanga kupomerwa mhosva yekudzima mumhanzi naMavhunga.

Mavhunga anonzi akaenda kuna Zheke achishandisa chisimba ndokumudzipa pahuro achibva azomusaidzira, mukadzi uyu ndokupunzikira pavheranda zvikaita kuti atyoke gumbo.

Mavhunga anonzi akaramba akamudzipa pahuro kusvika azorandutsirwa nevamwe vaive mubhawa umu.

Mushure mekuona kuti akanga akuvadza munhu zvakanyanya, Mavhunga anonzi akabva atiza.

Zheke akazobatsirwa kuti amhan’are nyaya iyi achibva aendeswa kuchipatara uye magwaro ekwachiremba akabuda mudare seumboo achiratidza hudzamhu hwekutyoka kwaakaita gumbo remukadzi uyu.