Kubvunzira pachiNdau
NDAUWE ndauwe, ngazvibongwe zuwa renyamashi rino.
Teiti mwakaita wani mumakanyiyo kwaChecheche, kwaTonhorai nekwaZamuchiya.
Nyamashi uno tinode kumbobhuya ngendaa yekubvunzira. Waite mukunda wako wakaseja, jaha rimweni rikati andimbomusii musikana uyu, saka ngaauye nemare tirye isisu anababa akwe. Handicho ere chironzo chacho?
Amweni anoti kuthee pfuma. Kuroorerana kwaiya kwakadodzana netsamutombo pachinyakare, asi choizwacho nyamashi achina chechakatodza, neshumo yacho tsakata kudai.
Ndapota, tisatengesa akunda edu, kunyazi akafunde kunganyi, mare haisi mutombo akadi, apana peinoguma.
Kuroorerana kubatanidze ukamazve, sakei kune gama rekuti mukwambo mukoko.
Ngatitange ngekureketa ngezvinodiwa ndianababa. Pane nhekwe yababa yeforya, kwouya kunonge mare ngemukunda uyu uri kuroorwa. Kwozoti mare yebonde, maburiro nemusana wamai, kazhinji inonga iri mwombe iyi.
Kune roora nepfuma, baba anorekete mwombe dzaanoda. Rekai ndidarike ndeiti, pachiNdau apana mwombe yechimanda. Iyi itsika yechiZezuru. Apanahe magorosari, itsika yechiZezuru iyi. Ndapota tisatore tsika isiri yedu kubudikidza ngekukhara.
Chetingati tanga tasiirira zvipfeko zvababa namai. Mai kwaiya kune bhureki rawo netshari ramai. Ukuwo heti yababa, mazuwa ano nesuthu yababa yaayo neyamai. Tingati ndizvo zviro zvaidiwa paibvunzirwe mukunda pachiNdau.
Zvekubvunzira zvino zviro zvaidakadza yaemho. Hama dzeeshe dzaidaidzwa, oungana bvuu mumhatso, asi chenyamasi, uri apa unoite chake mumhatso mwakemwo.
Asi ngatirekete teiti achizi kunaka. Rimweni zuwa ndakazozviite masonga ndavhakacha mumakanyi mwedimwo, akusi kutsveruka kwaakaita asharuka eduwo.