Kuputse mukunda
NDAUWE ndauwe, thongo redu rekupona kwaHlabiso, thongo reduro rekupona kunemwi ekwaHlerema, Hlukuzo neekwaDlakama. Tinodakara yaemho kumutekesa pano pachirongwa. Tinogonda teshe takamhoryoka yaemho. Kuti ariyo ane matenda, ngaaporeswe ndiMarure. Kuti ariyo ari kutamikirwa ngehama dzawo pane mukuwo uno, tinoti Marure ngaanyaradze yaemho.
Nyamashi uno padare redu tinode kureketa ngegama rinoti kuputsa. Kuputse hari ere kana kuti kuputse mbatso yakhona. Kuputse mukunda pachiNdau kuhine mukunda wako kune hurudza kubudikidza ngemahlupheko. Ngaari mahlupheko akhona etinoreketa ndiwo. Mahlupheko aigume kuputse mukunda kazhinji kacho yaiya nzara, ukazwa oti yabudisa zviyana, chiziye kuti kwashata.
Ndani ino yetakathwara inorekesa. Umweni wakadudze mukunda wake kuti ndiZvinorekesa, izvo zvinonga zveirekesa nazvo. Ndapota, tisaite zvinorekesa mumakanyimwo mwetinogara. Kugara kundoti tyoronhoro, ngechetinoda. Kuti uri muzakazi, ema uriwe muzakazi. Saka tiri kuti, kana mundani musikazi kuema kahle, munorekesa pheyani.
Pakuputsa apa, kazhinji anhu anonga eipenye chikhafu chemene. Kungazoita hako thumwombe nethumbudzi pano neapo, asi chikuru itsango yesadza. Musikana uyu unokone kunga ari mudoodori, saka unogare kumbatso kwake atei abve zera. Kuti yaguma nguwa yekuti achienda, kubva hurudza iyani youya hayo kootore mukadzi wayo.
Ndakafunda naye musikana waiya nedendaro rekuputswa. Taiya kumagiredhi mazuwawo teizwe kuti musikana uyu waakugare kumwamuna, musharuka wemunhu yaemho. Makuhwa aiti kunyazi waiyeyo, wainga asikachidakariri akadi. Tinobonga nyamashi uno mukhubawo akuchina akadi.
Hetinoreketa kudai, kune ndaa itori mudare mwamambo mumakanyi mwedumwo, iri kureketa ngemukadzi waiya akaputswa asi yena akaende kooroorwe kwaaida. Zvadaro, wakaagare makore makumi mashano asina kana mwana.
Chakaitike apa ngechekuti musikana uyu waiya akadirwa apo paakamboende kuyaa kwaanga akaputswa. Saka haakoni koobara iyo kwaari ngekuti wakadirwa kuti mukadzi wemunhu.
Uka tor emukadzi wemunhu wemene, pachiNdau unokumana nacho. Ngechakaitike pane uyu wakatore mukadzi wakadirwa, wakakumana nacho kwemakore mashano. Kundoti tsongo ifa, kuti aiya eiziye doodzi iri, waifanire kunga akatochibata kudhaya chirochi. Chisaide nyanga ichi, pachena yaemho kunga khuyu yedede.
Saka ndaa iyi yetinoreketa ndiyo, iri kupindahe mudare mwaMambo.
Apeeno kuti mambo uchati ngakuendwe kun’anga Chipinge ere kana kuti Phutukezi.
Asi chetinoziya ngechekuti mukadzi uyu unofanire kukhururwa kubve kune chidirwa ichi chaanacho.
Saka panongahe paakude kuzwisisana yaemho pakati paaya anababa nyakuputsa nanyakuputsirwa, ndipo pane singwisingwi yakhona.
Ndeiringirahe, panokone kuite kakuripirana paairi aya ngekuti pane wakagure chisungo, dai ndinyarini nyakuputsirwa, ndinotoda nani kuriphwa ngekuti ndakaponese mhuri iyi peyaiya yafukama ngenzara.