Mazita edu pachiNdau
NDAUWE ndauwe, yarira yekanyi! Ngatidhibanehe pano pachirongwa chedu chinodakadza yaemho. Tingaenderere mberi tisikazi kutekesana ere, achiiti ichocho. Mwakaitawani anhunai woye, kubvira ngekwaChecheche, Chikore neChirinda, anaDhliwayo anaDhlakama naana tsekuru Hlerema.
Ndinogonda mweshe mwakamhoryoka yaemo nemvura ino yazoti petuke, kunyazi mumunda mwacho amuchanyasi kuringirika akadi.
Nyamashi uno tinode kumbobhuya ngemazina edu ekubarwa pachiNdau. Tisati taenderere mberi, tinode kurekete kuti hai, apana chiro chiri munyika muno chisina zina kana kusaadaidzwa ngezina. Chingaite mushatirenyi kana kuti munakirenyi, cheeshe chine zina racho, ndaa go.
Tohwirirahe teiti, kunyazi ariyo mazina, asi apana zina rakanake kudai ngeraMarure, ndapedza apa, ngerekufuka nekuwarira.
Ngeari mazina etinokumana nawo mundaramo yeduna.
Uyehe, mazina aya kuti tizoapuwa kana kuashidzwa, zvinonga zvambobva ngekuri akhiti woye. Tiri kureketa ngemazina eanhu nyamashi, ngerimweni zuwa tichazophanda ngemazina embwa kuti aihambawo akadini.
Asi ngekuringira kwetinoite nyika, madudzirwe anoithwe mazina paanhu nepambwa, pane kakutodzana.
Kutodzana kwacho ngekwekuti pane mazina ekutuka, kuzhizhikire marewo emene. Izvi zvinorekethwa kubudikidza ngemazina, kuanhu nekumbwa zviriyo.
Zina kazhinji kacho unorizwa kuti iri rinotapira yaemho, kana kuti rine hwadzira kunga mengo mbishi nemapirikisi, apana chekuita. Rinonga rauya rakaringirana newe.
Ngatiphande ngemazina aya.
Kuna Dikani, uyu waiya mukadzi watsekuru angu. Anhu aiwone umberambera hwaiita tsekuru nemukadzi uyu, kubva akati ngatimupe zina rekuti Dikani, kubva ndiye wakaa Dikani wemene. Kunokuno waiona tsekuru angu ariyo kwaDikani wawo. Izita rakaseja, dai ndiri mukadzi ndaingarida nani.
Ngatimirudze rimweni zina, Pondai naMucharemba, rinoreketa naro rega iri.
Pondai henyu, asi pendiri pano andibvi, mucharemba ngekundireya, asi apana kwendinoenda.
Mukadzi uyu unonga echirekete zviro zvake eireketere pazina raanodudze mukunda wake mukorore kana kuti muzukuru.
Tozoita amweni akadai ndiana Tabonga, Tafadzwa naKudakwashe ngaamweni mazina akareruka kunga sadza negusha neguku. Mazina anodakadza aya. Dakadzwi, Dakarai, Chemusinakureyainyore naChemunoreya. Saka zviro zvakhona zvaireketerwe pamazina.
Chakanakahe chaireketerwe pamazinapo, chakashata nacho chaitungirwe pazina.
Kudai ngekuziye magariro edu mumakanyi nezviitiko zvenyika, waizodzadzisa wega kuti zina iri nyambira rakatangire apa, iro rochoohamba rikaema raguma pana Mwaringiseni naMwadaingenyi.
Teipete soko redu renyamashi tingati hedu kunyazwi zvakashata zviriyo, ngatiedze ngepetinokona kukowana mazina akamhoryoka pachiemo.