Mazina embwa pachiNdau
NDAUWE ndauwe!
Nyamashi uno ngatimboreketa ngemazina embwa. Mukati pane usikazii imbwa ere? Takambobhuya payana sureni tikati apana chiro chisina zina. Kana Bhoki naBhoko ane mazina, sakei teiti Bhoko nyamashi.
Mazina embwa anoenderane kududzwa kudai ngemadudzire etinoite eantu. Asi kazhinji kacho mazina embwa akanyanye kurerekere kumarewo, kuzhizhikira amuna woye.
Chese chisikareketeki hope ngehope anhu anochikandire pambwa – munyama wayo mbwa. Ndiyani ungade kutukwe kuti uri mbwa mukore uno? Zvinotonaya zvibhakera zvemupfekerwa nemumatsenganzungu.
Toredemo naSaraugare. Idzi imbwa mbiri dzendakakura nadzo mumakanyimwo ndeidziona munharaunda mwangumwo Chikore, Chaseyama, Chikwakwa, Chirinda, Checheche nekwa- Machongwe.
Toredemo anditi aundidi mumuzi muno. Saka tore demo unditeme kuti wachikona, nepfukwa yacho unonga watoiemera, ngatiseke teidaro akhiti. Kunyazi haundidi asi andifi ndakabude mumuzi muno, asi kuti watondidzase demo pahuro. Ndicho chipanga chiparure chacho.
Anoreketa unozwa oti, kushinga kunga muroyi pedzepo oti, kusvangurire uroyi ngekutsveruka, tinayo ndima yedu yeChindau tiri uno kwaNdima nekwaNdakopa.
Saraugare zvinobhuye kuti zvepano ndazvikorera, dai riri sadza, tinoti ndarikorera hangu ngemuriwo waro. Angaa maikuru ere anetsana nemubondo, mainini aya odudze imbwa yawo kuti Saraugare.
Kana kuti maikuruwo odudzawo yawo, kana zvadarozvo, chiziye kuti afunge zvekuoneke muthimba. Mucharemba ngeimweni imbwa yetinokone kureketa ndiyo. Kunyandireya mucharemba kureketa ndini mumuzi muno, asi chendagwinyira kugara pano.
Saka aya ndiwo amweni mazina etati timboreketa ndiwo ngemukuwo wenyamashi uno. Akawanda mazina etinoziya ekuzhizhikira, saka kana munawo emuchaziya, ngatirekete ndiwo pabandla pano.
Asi tisariyarwahe kuti tinawohe mazina echingezi etinohine imbwa nyamashi, kudai ngekuuya kwakaite vayungu munyika muno. Ayazve anaMandasi, imbwa yekwambuya Tuso. Asi Mandasi uyu waizoshata ngekude kuruma tsekuru Majeje eidarika hawo eitekese mukunda wawo, mukwambo neazukuru muNyamutsitsi mwawomwo. Yarira yekanyi!