Ndinobuda mukaka, ndiri mhandara

MUBVUNZO:

MAKADII Sekuru? Ini ndine dambudziko randisinganzwisise. Ndinobuda mukaka kuzamu rekuruboshwe, asi handisati ndamboita mwana, ndichiri musikana. Chii change chichikonzeresa izvi uye zvinopera here? Ndibatsireiwo.

Mhinduro:

Iwe muzukuru nevamwe vamwe vangange vaine dambudziko serako, izvi zvinogona kukonzerwa nemweya yakaipa.

Asika, iwe hauna kutiudza zvaunoona kuhope dzako kana kuti wakamboenda kwachiremba kana kukiriniki ukanzi kudii.

Nekuti pamwe zvinoda kumachiremba ekuchipatara asi hope dzako dzinogona kuva ngirozi yako dzichikuratidza zvine chekuita neupenyu hwako.

Zvichida unorota uchiita bonde kana kuyamisa mwana apa uchiri mhandara zvayo. Iyi inenge iri mweya yakaipa.

Zvisinei, iwe hauna kutaura kuti unomborota hope dzakaita sei.

Asi chandinoona pauri ndechekuti pane vavengi vari kukushereketera nemishonga, zvoita kuti upote uchibuda mukaka zamu rimwe chete.

Pamwe vanhu ivava vanokuita mukadzi kana kuti vanhu zvinhu zvavo zvinokuyamwa.

Zvinhu izvozvi zvinokwanisa kutokutadzisa kuroorwa.

Ndinokukurudzira kuti umbotanga waenda kumachiremba unoongororwa kuti chii.

Asi zvimwe zvinoda chivanhu, saka ndinoti batsirwa nevakuru vako — hama yepedyo — kutsvaga vanhu vanogona kupedza dambudziko rako muchivanhu.

Ukashandirwa zvakanaka muzukuru, dambudziko iri rinopera.

◆ Bvunza Kwayedza pa0775 421 949 kana 0715 942 183 ◆ Facebook: Sekuru Elisha Mutanga

Twitter: @sekuruelishamutanga Instagram: @sekuruelishamutanga_official