Varimi vogadzirira kukohwa
SANGANO rinomirira varimi reZimbabwe Farmers Union rinoti zvirimwa zvizhinji zvakarimwa muzhizha hazvisati zvasvika panguva yekukohwewa uye varimi vechibage vanokurudzirwa kuti vaone kuti chaoma sezvinotarisirwa vasati vachiendesa kunotengesa kumatura makuru enyika eGrain Marketing Board (GMB).
Mashoko aya akataurwa naZFU executive director, VaPaul Zakariya, vachiti zvakakosha kuti varimi vatsvage nzira dzekuomesa chibage chavo vasati vachiendesa kuGMB.
“Mwaka wekurima gore rino wakanonoka kana tichienzanisa negore rapera apo varimi vakadyara pakati pemwedzi waZvita naNdira asi zvirimwa zvese zvakaoma nekuda kwezuva izvo zvakaita kuti varimi vazodyara pakati pemwedzi waKukadzi naKurume. Mbesa idzi dzakararama zvekuti kwasara masvondo maviri kana matatu kuti varimi vange vachikohwa asi tinoda kuti vatange vaona kuti chibage chavo hachisina mwando wakawandisa. Kana chikaenda kumatura eGMB chiine mwando unodarika 12,5 percent, chinonoodza chimwe chibage kana kukonzera kubvira kwematura nekuda kwekupisa kunobva muhunyoro hwechibage apo chinosangana munzvimbo yachinenge chakavharirwa,” vanodaro.
VaZakariya vanoti GMB inotambira bedzi chibage chinenge chiine mwando usingadariki 12,5 percent.
“Varimi vanogona kukweretesana michina yekuomesa chibage (driers) asi izvi zvinoti dhurei saka tinovakurudzira kuti vange vachisiya chichioma nezuva. Mumwedzi waChikunguru naNyamavhuvhu, tinotarisira kuti varimi vazhinji vanenge vava kuendesa chibage chavo kuGMB asi tinokurudzira kuti vasakurumidza kukohwa chisati chapera hunyoro kuti vasazorasikirwa negoho,” vanodaro.
Zvakadai, VaZakariya vanokurudzira varimi kuti vatange vaita ongororo maringe nezvirimwa zvavanenge vachida kuzorima kuitira kuti vaone kana zvine misika ine mari.
“Kuchirimwa chefodya, basa riri kufamba zvakanaka asi vamwe varimi ndivo vari kukonzeresa matambudziko apo vanongoerekana vaenda nefodya yavo kumusika vasina kubhukisa izvo zvinoita kuti vagumisire vava kurara panze. Saka pakadai vanenge vava kunzi vatange vabhuka vogumisira vava kugara kumisika kwenguva ndefu. Nekune rumwe rutivi, tinokurudzira vemabhengi anenge achipa varimi mari kumisika uye bhengi guru reReserve Bank of Zimbabwe kuti vazadzikise zvavanenge vavimbisa kuvarimi nekuti varimi vakaudzwa kuti vachapihwa $300 iri musvo saka ndizvo zvimwe zviri kuita kuti varambe vachirarira kumisika,” vanodaro.
VaZakariya vanoti zvakakosha kuti misika yefodya inge ichiendeswa kuvarimi kuitira kuti vasadhurirwe nezvifambiso pamwe nekusangana nemamwe matambudziko akasiyana.
Panyaya yezvipfuyo, VaZakariya vanoti mafuro nemvura yekunwa zviriko zvakakwana.
“Zvipfuyo zvese kubvira pamombe, hwai, mbudzi, nguruve nezvimwe zviri kuyevedza zvikuru nekuti zviri kuwana mafuro akakwana nekuda kwemvura yakanaya nokudaro mitengo yezvipfuyo yakakwirawo. Dambudziko riripo bedzi ndere kumisika uko varimi vanosungirwa kuti vange vachibvisa mitero yepamusoro kumakanzuru apo vanenge vava kuda kuzvitengesa. Vanosungirwa zvakare kunotora mapurisa uye veDepartment of Veterinary Services zvinova zvinodhura nekuti zvese izvi zvinoda mari.
“Pamusoro pazvo, tiri kunzwa kuti veAgricultural Marketing Authority (AMA) vane imwe mhando yemutero yavanoda kuti varimi ava vange vachibvisa pakutengesa kwavanoita zvipfuyo zvavo zvinova zvinopa mutoro mukuru kumurimi,” vanodaro.