Akafa ayamwiwa nemupurwa
MUKADZI wechikuru wemubhuku raThombankala, kuZhombe, mudunhu reMidlands, ari kunzi akatumira mupurwa kuti unoyamwa ropa remuzukuru wake izvo zvakazokonzera rufu rwake.
Anastacia Nsingo (62) ari kupomerwa kutumira mupurwa kumuzukuru wake Gracious Ndlovu uyo unonzi wakanomuyamwa ropa rake achibva azofa.
Grant Ndlovu, uyo anove mwana waNsingo, anotsinhira nezvenyaya iyi. “Amai vangu vakadaidzira dare remhuri apo vakareurura kuti ndivo vakatumira mupurwa kuti unoyamwa Gracious zvikakonzera kufa kwake.
‘‘Mushure mezvo, vakazokumbira ruregerero kumudzimai wangu zvose nekwandiri,” anodaro Ndlovu.
Anoti mhuri yavo yakazoita chivanhu paguva reGracious.
“Takaenda kuguva remwana wangu uko takakumbira mushakabvu kuti aregerere amai vangu ava,” anodaro Ndlovu.
Mudzimai wake, Viola Sibanda, anoti pakutanga vanhu vaive parufu rwemwana wake vaipomera vabereki vake kuti ndivo varoyi.
“Vabereki vangu vakanongedzwa pazere vanhu vachinzi ndivo vainge vakonzeresa rufu rwemwana wangu. Saka mushure mekunge vamwene vangu vareurura, vabereki vangu vakabva vati vanoda kuripwa nemombe mhou shanu. Vakazobhadharwa $1 500,” anodaro Sibanda.
Nsingo anoti haakwanise kutaura mashoko akawanda pamusoro penyaya iyi.
“Takataura semhuri uye handikwanise kukuudzai zvatakakurukura pamusoro pazvo,” anodaro.
Anoti zvaakaita zvakakonzerwa nemweya wetsvina.
“Iye zvino handizi kunzwa zvakanaka uye ndiri kuno kuBulawayo (kurukisheni rweNguboyenja) uko ndiri kutsvaga kubatsirwa nekuti pane mweya uri kundinetsa pamusha pangu. Handikwanise kurara.” anodaro Nsingo.