‘Chivanhu, kunamata hatirege’
ZVISINEI nekurudziro iri kupihwa nebazi rezveutano nekurerwa kwevana yekuti vanhu vasaungane panzvimbo imwe chete uye vatore matanho ekurwisa kupararira kwecholera kuburikidza nenzira dzakadai sekusamhoresana nemawoko, kune vamwe vari kuramba vakaisa zvimiti munzeve.
Kusvika pakutanga kwesvondo rino, cholera yauraya vanhu 30 munyika yose apo vamwe vanodarika 5 000 vari kurapwa muzvipatara.
Hurumende nemamwe masangano anobatsira vari mushishi kurwisa chirwere ichi, icho chakatangira muguta reHarare ndokuzopararira nenyika.
Zvisinei, kune vamwe vanhu vanoti havasi kutevedzera zviri kukurudzirwa nebazi rezveutano sekusabatana mawoko vachiti zvinopesana netsika dzechivanhu.
Nyanzvi yezvechivanhu, Sekuru Thomas Yakiti Mukunguta (51) vekuChitungwiza — uko kanzuru yeko inoti chirwere ichi chavakowo — vanoti hapana chakamboipa kuti vanhu vabatane mawoko sezvakaita separufu zvisinei nekuti munhu afa necholera here.
“Kubatana mawoko parufu chinhu chinokosha zvikuru, ukasvika panhamo ukarega kubata mawoko zvakangofanana nekuti hauna kusvikapo uyezve pafiwa tinofanirwa kuungana zvinoreva kuchemana patsika dzechivanhu,” vanodaro.
Vanoti izvozvi kana vaine mitambo kana mapira avanoda kuita, havamire kuzviita vachiti vanochengetwa nemidzimu.
“Izvozvi ndikada kuita bira ndinoita, hakuna chinondimisa uyezve hapana kana dambudziko rinoitika.
‘‘Izvo zvekuti munhu afa necholera chitunha chonzi hachisvike mumusha make chivanhu hachidaro, mudzimu wemunhu uyu unozodzoka sei kuzochengeta mhuri iye mufi aradzikwa achibva nemusango pasina kuonekana nemusha wake? Zvakare hama dzinofanirwa kuonekana nemufi inova tsika yechivanhu,” vanodaro.
Madzibaba Gamba veJohane Masowe yeChishanu vekuBudiriro vanoti vari kutevedzera kurudziro iri kupihwa nemapoka akasiyana mukurwisa kupararira kwecholera.
“Kunamata hatirege asi chatave kuita hatichaungana nguva imwe chete, tave kuita zvikamu nezvikamu.
‘‘Vanhu vatinobatsira tiri kuvati vauye nemvura yavo yakafashaidzwa kana kuita yekutenga muzvitoro iyo tinovaisira miteuro yavo nekuti tinorapa nemvura yavanonwa,” vanodaro.
Cholera inokonzerwa nehuchapa pamwe nekunwa mvura kana kudya chikafu chine tsvina.
Mugore ra2008, cholera yakauraya vanhu vanosvika 4 000 muZimbabwe.