Opinda nedemo muchechi-Peji
VATENDI vechechi yeMinana YaJehovha Apostolic Church yekuBuhera vakadzvamuka vachitiza neupenyu hwavo vachisiya zvekunamata apo mumwewo murume akangosvika vari pakati pekunamata akasimudza demo mudenga ndokuzorova vanhu kusanganisira murwere aishandirwa.
Murume uyu akabvumburudza kurova vatendi ava – vamwe achiita vekutema nemabwe – asati akwira muzimuti repanonamatirwa nevanhu vechechi iyi iro akatanga kutema mapazi achitukirira nezvinyadzi.
Tafadzwa Ushe (35) wemubhuku raUshe, kwaMambo Nyashanu, svondo rapera akamiswa pamberi pamutongi Gylmax Kuhudzai weMurambinda Magistrate Court achitarisana nemhosva yekurova uye kuzvidza dare zvichitevera mumwe mutongo waakange ambopihwa nedare rimwe chete iri.
Ushe ari kuramba mhosva iyi achiti nzvimbo inonamatira vanhu vechechi iyi ndeyake.
Ushe nevechechi iyi vari kunetsana nekuda kwenzvimbo iyi.
Musungwa uyu anoda kuti kereke yeMinana YaJehovha Apostolic Church ibve panzvimbo iyi, yotsvaga kumwe kwekunonamatira, izvo zviri kurambwa nevakuru vechechi iyi vachiti nzvimbo yacho ndeyavo.
Ushe ari kutarisirwa kudzoka mudare achitarisana nemhosva yaakapara iyi nemusi we16 Gunyana gore rino.
Ushe akambokonzera zvakare nyonganiso pachechi iyi nemusi wa19 Nyamavhuvhu gore rino.
Anonzi nemusi uyu, akaenda pachechi apa ndokutanga kutora mifananidzo yevatendi vaivepo achikanganisa mafambiro akanaka ezvinhu.
Musi wa16 Gunyana, Ushe anonzi akaenda pamasowe apa zvakare akapakatira demo achiti aida kutema munhu wose aizomurambidza zvaaida kuita.
Anonzi akatanga nekutukidzira vanamati vaive apa nezvinyadzi avo vainge vakagara pasi pezimuti. Mushure mezvo, Ushe anonzi akabva azokwira mumuti uyu ndokutanga kutema mapaza ayo aiwira vanhu vaive pasi.
Ushe anonzi akaenderera mberi nekutukidzira vakuru vechechi iyi achivapomera kuti vakange vatora chidimbu chemunda wake kuchiita masowe avo.
Musungwa uyu anonzi akazodzika mumuti uyu ndokutanga kutema vanamati ava nematombo zvikaita kuti vaite bararamhanya vachitiza neupenyu hwavo.
Munyonganyonga iyi, Ushe anonzi akabata Shupikai Manondo ndokubva amuzvambaradza.
Manondo aive murwere akange aenda pamasowe apa achitsvaga kubatsirwa.
Nyaya iyi yakazomhan’arwa kumapurisa nemukuru wechechi iyi, Bishop Bernad Murombo (38), zvikaita kuti Ushe asungwe.