Votongerwa kurova vatori venhau
KUTONGWA kwenyaya yekurohwa kwemutori wemufananidzo weKwayedza, Tertia Mukurumidze (24), apo aive pabasa kwaSeke kwasvika kwamvura yacheka makumbo sezvo nyaya iyi yave padanho rekuti ichipihwa mutongo mudare reChitungwiza Magistrates Courts.
Mukurumidze anonzi akarohwa nevamwe vagari vemubhuku raMagodi, kwaSeke, apo aive pabasa aine mutori wenhau weKwayedza Kingstone Mapupu nemutyairi Charles Nyakudya.
Muchuchisi Norman Koropi anoti nyaya iyi ichapinda mudare zvekare nomusi wa24 Ndira apo yasvika padanho rekupihwa mutongo.
Muchuchisi Koropi anoti gweta revasungwa harina kuunza magwaro ekuti vamwe vasungwa vaviri vasara vange vachiregedzwa nedare (application of discharge).
Pakatanga kupinda nyaya iyi mudare iri, yakanga iine vasungwa vatatu avo vaipomerwa mhosva yekurova mumhan’ari.
Vasungwa ava ndiSabhuku Samson Magodi (46) vekwaSabhuku Magodi, Rita Tanyaradzwa Ruzvidzo (35) naJairos Magodhi (38) uyo akaregedzwa nedare munguva pfupi yadarika mushure mekunge vafakazi vari munyaya iyi vamuchenura pamhosva yekurova.
Muchuchisi Koropi anoudza dare kuti nomusi wa11 Gunyana gore rapera munguva dzemasikati, Makurumidze anonzi akanga ari pabasa achibva atora mifananidzo yaSabhuku Magodi naRuzvidzo.
Sabhuku Magodi anonzi akazokonzera mhirizhonga apo akakurudzira vanhu vaivepo kuti varove Makurumidze.
Makurumidze anonzi akarohwa kakawanda, kudzipwa pahuro nekubviswa wigi yaiva mumusoro make achinzi aifanira kudzima mifananidzo yaainge atora.
Magwaro ekwachiremba anoratidza hudzamhu hwekukuvara kwaMakurumidze akaburitswawo mudare seumbowo.
Vasungwa ava vari kutongwa nemhosva yekurova (Assault as Defined in Section 89 (1) (a) of the Criminal Law Codification and Reform Act Chapter 9:23.
Vose vari kuramba mhosva yavari kupomerwa iyi.
Vari kumiririrwa negweta ravo reMutetwa Law Chambers.
Sabhuku Chamunorwa Seve (74) vemunzvimbo iyi, Mapupu naNyakudya ndivo vamwe vevamhan’ari munyaya iyi.