Chikoro chemabasa emaoko kuMudzi
VADZIDZI vanoda kuita fundo yemabasa emaoko sekuveza kudunhu raMambo Nyamukoho, kuMudzi, kuMashonaland East, vachabatsirikana zvichitevera kuvakwa kuri kuitwa koreji munzvimbo iyi.
Theological College ikoreji yakavambwa mugore ra2016 iyo iri kuvakiswa naMambo Nyamukoho VaSamson Katsande vakabatana nechechi yeActive Ministry nedonzvo rekuwanisa dzidzo yemabasa emaoko muMudzi neMutoko.
VaRukariro Katsande (50) — avo vanova mwanakomana wamambo uye vakafanobata chigaro chaMambo Nyamukoho — vanoti koreji iyi inodzidzisa hufundisi ichisanganisawo nemabasa emaoko.
“Mambo Nyamukoho, VaSamson Katsande (98), vakapa nzvimbo yekuvakwa kwekoreji iyi pachena uye vari kubatsirawo mukuivaka uye tinoda kuti izova yunivhesiti yekuno. Hatidi vana vanozobva muno vachienda kunodzidza kure.
“Koreji iyi ichadzidzisa mabasa emaoko anoenderana nezvatinowana kuno tichibatsirana kuti koitwa zvidzidzo zvipi,” vanodaro VaKatsande.
VaWiscord Kudakwashe (31) vechechi yeActive Ministry vanotenda Mambo
Nyamukoho nekuvapa mvumo yekuvaka koreji iyi.
“Chikoro chino chiri kuvakwa nemushandirapamwe wamambo, vanhu vemunharaunda nechechi yeActive Ministry. Donzvo nderekuti mafundisi echechi iyi asamirire kuparidza chete, asi kuti vawanewo mamwe mabasa emaoko anovabatsiridza kuwana cheuviri.
“Vamwe vagari vemunzvimbo ino vanogonawo kuwana mabasa emaoko ekuita, kungava kuveza, kuvaka nezvimwe zvakasiyana,” vanodaro VaKudakwashe.
Koreji iyi inotarisirwa kupera kuvakwa mugore ra2021 apo inenge yave nedzimba dzekudzidzira, dzekugara vadzidzi vanobva kure, dzimba dzevadzidzisi, nedzimwe dzekuchengetera midziyo nezvimwe.
“Tinotarisira kuti chikoro ichi chichadhonza vamwe vadzidzi vanobva kune dzimwe nyika dzekunze,” vanodaro.
VaKatsande vanoti Mambo Nyamukoho kubva kare munhu anosimudzira nyaya dzedzidzo.
“Baba vangu vakaberekwa naSgt Jekuche Katsande ndokuita Standard 6. Vakazodzidzira kuva mudzidzisi kuHartzell ndokuzodzidzirawo kuvaka, vakazodzidzisa muzvikoro zvakawanda muno maMutoko nekuBulawayo,” vanodaro.
Vanoti Mambo Nyamukoho vakazotanga mabhizimisi avo kumakore ekuma1950 kwaNyamukoho kwakare apo vakazoenda kwaMutoko vave kushandisa zita rekuti Mapereke.
“Kubva mumabhizimisi avo, vakaumba homwe yekubatsira vana vanoshaya nekuvapinda chikoro, zvikuru vanasikana. Vakabatsira mukuvakwa kwezvikoro zvakawanda muno nekuvakawo machechi anodarika zana,” vanodaro VaKatsande.
Vanoenderera mberi vachiti, “Vana vanobatsirwa nababa vangu vanodarika 2 000. Mumwe akazodzoka kubva kuMalaysia kuzotenda baba vangu avo vakanga vasisamuzive. Saka nanhasi vana vari kubatsirwa kuenda kuchikoro, kunyaya dzemitambo vanobatsirawo uye pagore vanosarudza vana vemuno 9 vekubhadharira chikoro,” vanodaro VaKatsande.