Koshesa upenyu
ZIMBABWE nemusi weChipiri svondo rino yakasimbaradza chirongwa chekurwisa kupararira kweCovid-19 izvo zvakaona ichibva padanho reLevel Two ichidzokera paLevel Four Lockdown.
Matanho aya anotevera kuwanda kuri kuita vanhu vari kuwanikwa vaine chirwere ichi mushure mekuvhenekwa pamwechete nevari kufa.
Pasi pemitemo mitsva yekurwisa Covid-19, veruzhinji vari kukurudzirwa kuti vagare kudzimba kwemazuva 30 anotevera.
Vanhu vari kutenderwa kuenda kumabasa bedzi ndeavo vanoita mabasa akakoshesesa.
Mamwe magungano sekumachechi, kuita michato nekuvhurwa kwemabhawa zvose zvakambomiswa nedonzvo rekumisa kupararira kweCovid-19.
Pamusoro pezvo, veruzhinji vanokurudzirwa kupfeka mamasiki nemazvo, vorega kuita chitsoko-tsoko, vachigeza nekuzora mawoko mushonga unobvisa nekuuraya hutachiona uye kuongororwa kudziya kwemuviri.
Matanho akasimba aya ari kutorwa panguva iyo paine kunyuka kwemhando itsva yechirwere cheCovid-19 icho chinonzi nenyanzvi dzezvesainzi chinotapuriranwa nekukasika kana zvichienzaniswa nechagara chiripo.
KuSouth Africa nekuUnited Kingdom, mhando itsva yeCovid-19 iyi yatoveko uye nyika mbiri idzi pari zvino dziri mushishi yekusimbaradza matanho ekurwisa denda iri.
Zvakakosha kuti vanhu vemuZimbabwe vatevedzere matanho ose akananga kumisa kupararira kwechirwere ichi.
Matanho ari kutorwa aya chinangwa chikuru ndechekuchengetedza utano neupenyu hwevanhu, kwete kuti aripo kuomesera veruzhinji. Upenyu pamberi, zvimwe zvose zvozotevera!
Kupfeka masiki kunobatsira munhu anenge akaipfeka kwete vabati vezvemutemo semapurisa.
Kuenda panzvimbo dzinoungana vanhu pamwe nekuita chitsoko-tsoko kunoisa munhu anoenda panzvimbo idzodzo panjodzi yekubatira denda iri.
Pakaitwa chirongwa chekutanga chelockdown neHurumende munaKurume gore rapera, mumazuva ekutanga veruzhinji vaitevedzera zvaidiwa nemazvo.
Asi, nekufamba kwenguva vanhu vakapedzisira vave kuita chijairira vasisapfeke mamasiki, vave kungofamba zvisina tsarukano uye nekuita chitsoko-tsoko.
Panguva iyi nyanzvi dzezveutano, kusanganisira sangano rinoona nezveutano pasi rose reWorld Health Organisation (WHO), vakayambira pamusoro penjodzi yekunyuka kechipiri kweCovid-19.
Asi kune vanhu vakawanda vakaramba vakaisa zvipikiri munzeve uye vamwe vekumaruwa vakange voti Covid-19 inowanikwa kumaguta sekuHarare neBulawayo chete.
Nhasi chirongwa ichi chadzoka zvakare nekuda kwekusaita hanya uye kuvarairwa kweveruzhinji maringe nekurwisa Covid-19.
Tinovimba kuti palockdown iripo pari zvino veruzhinji havazi kuzoita zinyeke-nyeke panyaya yekutevedzera matanho akatarwa senzira yekurwisa kupararira kwechirwere ichi.
Hazvisi nyore kuti Hurumende itore danho rekuti veruzhinji vagare kudzimba kwemazuva 30 sezvo izvi zvichikanganisa nyaya dzekusimukirwa kwehupfumi nekuti nyika inobudirira kana vanhu vachishanda.
Asi Hurumende yakasarudza kutora danho iri chinangwa chikuru chiri chekuchengetedza utano neupenyu hweveruzhinji.