Zvakanakira kuzvitonga kuzere
MWAKA uno ndewekucherechedza kuzvisunungura kwatakaita muno munyika yedu yemadzitateguru, nyika yechipikirwa, nyika yeZimbabwe.
Nokudaro mumwe nemumwe wedu ngaabate basa mazuva ose aine chinangwa cherusununguko rwuzere mukurera vana vedu mudzimba dzedu, munharaunda yedu, mumabasa edu, muzvikoro zvedu nemunyika yedu.
Tinotenda zvikuru varwi verusununguko avo vakabata basa guru rekurwisa vapambepfumi nevose vane chavakaita kuti tiwane rusununguko urwu mugore ra1980, hezvo nhasi tave nemakore makumi mana nerimwe tawana rusununguko urwu rwataichemera.
Asi pakati pedu tine vakawanda vasingaone mikana yatinayo yekuzvisunungura yatakapihwa nerusununguko urwu. Dare rino rinoti rusununguko rwukuru kuvhurwa njere kwatakaita kuti tione chakanaka nechakaipa muhugaro hwedu. Chakanaka tinochipembedza, chakaipa tinochimhura nekuchigadzirisa.
Zvino dare rino riri kuona zvose zvakanaka nezvakaipa zvinotitadzisa.
Chakanaka chinoonekwa nedare rino ndechekuwanda kweruzhinji rwenyika ino rwava nedzidzo yepamusoro, dzidzo inofanira kutibatsira senyika kuita mabasa epundutso kubva mudzimba dzedu dzatinobva kusvika pose patinobata tiri semhuri yeZmbabwe. Dzidzo yatakawaniswa iyi, vamwe vedu tiri kuishandisa zvisizvo, asi vamwe tinoishandisa zvakanaka.
Vanoishandisa zvisizvo ndevaya vanoparadza pfuma mudzimba dzedu, mumakambani medu, napose patinobata tiri tichishandisa hunyanzvi hwedu mukuita zvenhafu pazvinhu zveruzhinji. Asi nerumwe rutivi tine vamwe vanoedza chaizvo
kubata mabasa avo muchokwadi muminda, mukugadzira zvinhu zvinoita kuti tirerukirwe neupenyu nekutangisawo makambani avo munyika ino. Ava ndivo vanhu vari kupa muenzaniso wakanaka kuti ruzhinji rweZimbabwe rwuwane kuzvisunungura kuzere mupfungwa dzedu nemukugara kwedu.
Kuzvisunungura uku kunotibvisa muhurovha hunotisvitsa mukuba, kudhakwa nemutoriro kana nefodya, hufeve, nemamwe mabasa ose asingatambirike muupenyu hweruzhinji munyika yedu yeZimbabwe. CHENJEDZO:
Dare rino rinoda kutipa chenjedzo yekuti tishandise njere dzedu dzatinopihwa muzvidzidzo zvedu zvose mune zvakanaka kuti nyika yedu yechipikirwa isave chiseko tichiita zvinhu zvekukumbira kune dzimwe nyika asi isu tiine zvose munyika medu.
Nokudaro ngatishandiseiwo maoko edu kugadzira zvinhu zvedu tega mumakambani eduwo isu Madzimbahwe tigodada nazvo kana vamwe vachiuyawo kuzotsvaga zvakagadzirwa munyika medu. Izvi zvinotanga nemakambani madiki pashoma nepashoma. Tinosvika chete patinoda.
Ndikowo kufamba kwakaita nyika dzakabudirira kwatiri kudai kumhanyira nhasi uno tichiramba tiri muhutapwa. Mabasa emaoko, mabasa ane chinobatika, anoita kuti mhuri dzedu dzigute, mabasa anopa nhaka yekuzvisunungura zvizere mumibato yedu yese. Nokudaro ngatirangarirei kuzvisunungura kwatakaita tiine muono wekuti tisazove nhapwa zvakare mupfungwa dzedu, nemumibato yedu, uye nemunyika yedu tichiita mabasa emaoko tichigadzirawo makambani edu.
Wedzerai Nhemachena ndigodobori wezvefundo (PhD Business Management;
Corporate Strategy and Economic MBA Policy; neBA English & Communication Studies). Anobata nemauniversity akawanda muZimbabwe. Nhare: 0772-428809 Email: wedzerainh@yahoo.com