MaChevrons ogadzirira Bangladesh
CHIKWATA chenyika checricket chemaChevrons chiri pakati pekuita gadziriro dzacho dzekuzosangana necheBangladesh mwedzi unotevera mumitambo mitatu yeOne-Day International (ODI), mumwechete weTest nemitatu yeTwenty20 International.
Mitambo yezvikwata zviviri izvi ichatanga musi wa7 Chikunguru uye zvichatanga nekubandana mumutambo weTest zvozosangana mumitambo yeODI iyo ichange iri yeInternational Cricket Council (ICC) Men’s Cricket World Cup Super League yekurwira kuenda kumutambo we2023 ICC Men’s World Cup iyo ichazotambirwa kuIndia.
Pachinyorwa chakabva kuZC chinoti mitambo yose ichatambwa nemaChevrons neBangladesh ichange isina vatsigiri vachange vachiona sezvo panguva ino vatsigiri vasiri kutenderwa kunhandare dzemitamo yose senzira yekuderedza kuungana kwevanhu kuitira kuti denda reCovid-19 risapararire pakati peveruzhinji.
“Mutambo wemaChevrons neBangladesh uchatambirwa kuHarare Sports Club pasina vatsigiri uye mutambo weODI weSuper League uchange uri wekurwira tikiti rekuenda ku2023 World Cup iyo ichatambirwa kuIndia.
“Mutambo weSuper League une zvikwata 13 uchaona zvikwata zvinomwe zvinopedza zviri pamusoro kusanganisira India zvichibudirira kuenda kumutambo uyu. Zvimwe zvikwata zvishanu zvinenge zvasara zvinozonokwikwidza kune umwe mutambo wequalifier uyo uchazoona zvikwata zviviri zvichihwiniswa tikiti rekutevera kuIndia,” ZC inodaro.
ZC inozivisa kuti pachasangana maChevrons neBangladesh zvikwata zviviri izvi zvichange zviri mubio-secure bubble izvo zvinoreva kuti zvikwata zviviri izvi zvichange zvichigara zvoga munzvimbo iyo ichange isina veruzhinji uye vasingasangane neveruzhinji izvo zvinobatsira zvikuru mukuderedza kutapurirwa kwedenda reCovid-19.
Zvakadaro, ZC yakazivisa zvekare svondo rino kuti vatambi vayo vanosvika 27 vakakwanisa kubaiwa nhomba yekudzivirira Covid-19 pamwe nevashandi veZC vanosanganisira varairidzi vechikwata ichi vanosvika 20.
Vatambi vemaChevrons vanosanganisira Regis Chakabva, Tendai Chisoro, Richmond Mutumbami, Timycen Maruma, Wellington Masakadza, Richard Ngarava, Victor Nyauchi, Wessly Madhevere, Milton Shumba, Tinashe Kamunhukamwe, Tadiwanashe Marumani, Carl Mumba, Charlton Tshuma, Tanaka Chivanga naTakudzwanashe Kaitano vose vakabaiwa nhomba kuchipatara cheParirenyatwa svondo richangodarika.
Kozoti vatambi vechikwata chemaLady Chevrons vanosanganisira kaputeni wechikwata ichi Mary-Anne Musonda nevamwe vatambi vanoti Precious Marange, Modester Mupachikwa naEsther Mbofana vose vakatobaiwawo nhomba yeCovid-19.