Gwenyambira oimba zveCovid
MUDZIMAI wechikuru wekwaNyashanu, kuBuhera asi achigara kuChitungwiza, anoti ari kuparidza kuipa kwechirwere cheCovid-19 nekuendesa mashoko kuruzhinji nemusambo wembira idzo anoridza.
Mbuya Joice Mbera Masibanda (62) vanoti vakadzidziswa kuridza mbira naSekuru Gora VaEnock Wadharwa avo vakashaika.
Mbuya Masibanda vanoridza mbira mudare raMbuya Mamoyo vekuChitungwiza, vachiti vanonyora nziyo nekudzidzisa nezvechirwere cheCovid-19.
“Chirwere cheCovid-19 chakauya pasi rose uye chapedza kuuraya vakuru nevadiki uye kune vazhinji vari kurwara nacho. Ini sagwenyambira, ndakaona zvisina kukodzera kuti ndingonyarara saka ndinofambisa mashoko ekuipa kwechirwere ichi nembira dzandinoridza.
“Ndine nziyo, kusanganisa Iwe Covid Uri Mhunza Musha, Uchaenda Riinhiko Nhaiwe Muroyi Covid, Kune Achasara here rwendo rwuno, nedzimwe,” vanodaro Mbuya Masibanda.
Vanoti vachiita basa ravo rekusvitsa mudzimu waGogo Mamoyo, vane nziyo dzakawanda dzavakanyora dzine chekuita nekuparidza mashoko eutsanana ekurwisa chirwere cheCovid-19.
“Ndine bhuku rine nziyo dzandakanyora kwemakore anodarika makumi maviri idzo dzinodarika makumi mashanu. Dzimwe ndinoita dzekurotswa, dzimwe dzichingouya mumusoro ndigere uye mukoma wangu aisvikirwa apo Sekuru Gora vairidza mbira ipapo vachisvitsa midzimu. Saka ini ndaingomuka ndotora mbira dzaSekuru Gora ndotanga kudziridza,” vanodaro Mbuya Masibanda.
Vanoti havana munhu akavadzidzisa kuridza mbira asi kuti zvakangouya zvoga vachiona zvaiitwa naSekuru Gora.
“Ndinonyanya kunyora nziyo dzinofambirana nezvinoitika munyika saichochi cheCovid-19 isu sevaimbi tinofanirwa kuparidza shoko rekuchenjedza ruzhinji. Sepanguva yakaita cholera, mhezi, mamota, dzihwa, hwiza, nezvimwe zviitiko ndakanyora nziyo ndichichenjedza vanhu,” vanodaro.
Mbuya Masibanda vanoti dambudziko ravo guru kushaya mari yekutsikisa nziyo dzavo asi vanoti vane hurongwa hwekutsvaga mari kuruzhinji yekuti vatsikise nziyo dzavo.
“Dambudziko rangu guru kushaya mari yekuti nditsikise nziyo dzangu, Mbuya Mamoyo vakavimbisa kundibatsira nemari yekuti nditsikise. Asi handidzivise vamwe vanoda kundibatsira uye vanogona kundibata panumber dzinoti 0774 411 990,” vanodaro Mbuya Masibanda.
Vanoyambira vamwe vaimbi nevane zvipo zvakasiyana kuzvishandisa kuparidza kuipa kwakaita Covid19.
“Isu vaimbi nananyanduri nevatori venhau vakaita semi tine basa guru rekuparidza mashoko ane chekuita nechirwere cheCovid-19 kuti vanhu vazive zvizere. Saka ndinoti dai vanhu vandibatsirawo ndatsikisa nziyo dzangu ndiparidze mashoko,” vanodaro Mbuya Masibanda.