Covid-19 handi jee, zvidzivirire
ZIMBABWE pari zvino yakatarisana nedambudziko guru rekurwisa kupararira kwechirwere cheCovid-19 zvichitevera kunyuka kwakaita denda iri ketatu (third wave) muno.
Huwandu hwevanhu vari kubatwa nechirwere ichi pamwe nevari kufa nacho huri kukwira zuva nezuva izvo zvinoratidza mamiriro ezvinhu asina kunaka zvachose.
Kusvika nemusi weChipiri svondo rino, vanhu 88 415 vange vawanikwa vaine Covid-19 mushure mekuvhenekwa muZimbabwe. Pavarwere ava, 58 155 vakatopona asi vamwe 2 747 vakafa. Nyanzvi dzezveutano dzinoti Covid-19 iri kunyanya kupararira nekuda kwekushaya hanya kweveruzhinji kutevedzera matanho akatarwa neHurumende pamwechete nesangano reWorld Health Organisation (WHO) ekurwisa chirwere ichi.
Semuenzaniso, veruzhinji vari kukurudzirwa kuti vapfeke mamasiki nenzira kwayo vakavhara mhuno nemuromo asi kune vamwe vari kufamba vasina kupfeka mamasiki aya.
Vamwe ndivo vari kufamba vakaarembedza muhuro zvinoreva kuti hapana kuzvidzivirira kwavanenge vachiita kubva kudenda iri.
Ino haizi nguva yekuti munhu anogombedzerwa kana kumanikidzwa kupfeka masiki.
Masiki inochengetedza upenyu hwemunhu anenge akaipfeka kwete kuzoipfeka nekuti munhu aona vabati vezvemutemo semapurisa.
Panyaya yendufu, Hurumende yakadzika mutemo wekuti vanhu vanotarisirwa kuve pamariro havafanirwe kudarika 30 asi vashoma vari kutevedza mutemo uyu nemazvo.
Vanhu vari kuonekwa vari panhamo nehuwandu hwavo, zvikuru kumaruwa. Pamusoro pezvo, vanenge vakaita chitsokotsoko vasina kupfeka mamasiki zvakare.
Vamwewo ndivo vanobatana maoko nekumbundirana izvo zvine njodzi huru yekukonzera kupararira kweCovid-19.
Kune vamwe zvakare vachiri kuita tsika yekurarisa chitunha mumba husiku hwose uye nekuonekedzana nemufi izvo zvinopesana nemitemo yekurwisa Covid-19.
Nyanzvi dzezveutano dzinoti denda iri riri kunyanya kupararirawo nekuda kwekusatevedzerwa kwematanho akatarwa nevanhu vanenge vari parufu.
Nerimwewo divi, kune vemabhawa nemashabhini vari kuvhura zvechitsotsi izvo zvakare zviri kukonzera kupararira kwedenda iri.
Asi kana ivo vanhu vacho vari kuenda kumabhawa nemashabhini vanoita sevane pfungwa dzisina kunyatsoti kwesere.
Nemamiro akaita zvinhu pari zvino, munhu unofanirwa kukoshesa upenyu hwako nehwemhuri kwete kuhuisa panjodzi nenyaya yekuda doro.
Chirwere cheCovid-19 chiriko uye chiri kuuraya.
Kana vanhu vanodarika 70 vachifa nedenda iri munyika pazuva rimwe, haisi nyaya yekuita dambe nayo.
Sekutaura kwemutungamiriri wenyika President Mnangagwa, nyaya yekurwisa kupararira kweCovid-19 inoda mushandirapamwe wenyika yose.
Zvakakosha zvakare kuti kunze kwekutevedza mitemo yakatarwa yekurwisa denda iri, veruzhinji vaende nehuwandu hwavo kunobaiwa majekiseni ekudzivirira Covid-19.