Varimi vofadzwa negoho
VARIMI vekuBanket nekuRaffingora, kudunhu reMashonaland West vari kupembera nemufaro nekuda kwegoho guru ravakawana mwaka weZhizha wadarika zvichitevera kunaya kwemvura kwakanaka.
Maneja wepapurazi reNdare, kuRaffingora, VaDavid Makombe (61) vanoti vakarima mahekita makumi mashanu nemana echibage uye vakatopedza kukohwa.
“Tinotenda Mwari vakaunza mvura yakawanda mwaka wadarika. Takarima zvekuzamurira sezvinotaurwa nevechidiki, pamahekita 54 taitarisira kukohwa kuenda mberi chaizvo asi mvura yakawanda kune mimwe minda yedu sezvo takadyara chibage ichi mazuva akasiyana. Saka tiri kutarisira matani anodarika mazana maviri negumi.
“Takatotanga kuendesa chibage chedu kuGrain Marketing Board (GMB) yekuno kuBanket,” vanodaro VaMakombe.
Vanoenderera mberi vachiti, “Takarimawo mapfunde pamahekita makumi mana nemashanu tichibatsirwa nekambani yeDelta. Tiri kutarisirawo kukohwa matani maviri nechidimbu kana matatu pahekita, kureva kuti goho redu rinofanirwa kutipa matani anodarika zvishoma 135.”
Vanoti kunaya kwemvura kwakanaka uku kwakaitawo kuti vawane mukana wekupinza vanhu vemunharaunda mavo mabasa ekushanda muminda anosanganisira kusakura, kukohwa, kutonongora chibage nekuisawo mumasaga vachisona kuti goho riende kuGMB.
“Izvozvi takaendesa chibage matani makumi matatu, kutaura kuno matani makumi mashanu nemana akamirira kutakurwa kuenda kuGMB,” vanodaro VaMakombe.
VaAbel Chinawa (24) vanoshanda papurazi reMbidzi riri kuBanket vanotiwo gorosi ravo remuchando rakanaka zvikuru.
“Gorosi redu rakanakisa zvikuru. Tine minda yakawanda yatinorima tichishandisa madiridziro uye mvura yakawanda nekunaya kwayakaita saka inokwanirana nemabasa edu,” vanodaro VaChinawa.