MITAMBO Nhabvu yadzoka muHarare
MITAMBO yeCastle Lager Premiership iri kudzoka muguta reHarare svondo rino apo pachaona Dynamos FC ichisangana neCAPS United mumutambo weHarare Derby kuNational Sports Stadium nemusi weSvondo.
Nhandare yeNational Sports Stadium yange isiri kutambirwa mitambo nekuda kwedambudziko remvura uye ichivandudzwa zvekare kuti isvike padanho rinotenderwa kunzi igotambirwa mitambo yePSL.
Kuvhurwa kwenhandare iyi kunotevera chikumbiro chakaitwa neDynamos iyo yakanyorera kusangano reSports and Recreation Commission (SRC) chekupihwa mvumo yekuti mutambo uyu ugotambirwa muNSS.
Zvichitevera kuvharwa kwainge kwakaita nhandare dzese dzemuHarare, zvikwata zvizhinji zvemuHarare — kusanganisira Dynamos, CAPS United, Yadah Stars neHerentals College — zvange zvichishandisa nhandare dzinosangansira Babourfields kuBulawayo, Mandava Stadium kuZvishavane neBata Stadium kuGweru kutambira mitambo yazvo.
Zvakadaro, director-general weSRC – Eltah Nengomasha – anoti sangano ravo richagara pasi nePSL vozeya kuti nhandare iyi inogona kutambirwa mitambo yakadii.
“Tiri pakati pekuita hurukuro nePSL yekuti tigoona kuti National Sports Stadium inogona kutambirwa mitambo yakawanda sei uye tichiongorora nhandare iyi kuti yasvika padanho ripi zvichitevera kuvandudzwa kwayaiitwa,” anodaro Nengomasha.
Mimwe mitambo yePSL iriko svondo rino, ichaona Highlanders ichienda kuHwange kunosangana neHwange kuColliery Stadium nemusi weSvondo, kuchiti FC Platinum ichange iri pamusha apo ichabandana neHerentals College nemusi weMugovera.
Ngezi Platinum Stars, iyo iri kutungamira palogo rePSL mwaka uno, iri kunanga kuNyamhunga Stadium kuKariba uko ichatatsurana neZPC Kariba nemusi weMugovera.