‘NHABVU HANDI MARI’
TANGA kundishevedza kuti Bomber nekuti ini ndainwisa bhora nemakumbo ese pamwe nemusoro uye mabhora acho aisabatika zvekumhanya. Saka Mambara akatanga kungonditi Bomber zvikabva zvatopfumbira
Bomber ndiani, zvikanzi handiti ndiwe Maronga Nyangela here, ndikati ndini, zvikanzi Bomber izita rako remadunhurirwa rawakapihwa naEvans Mambara.
“Zita iroro rakauya pamusana pekubhomba kwandaiita nemusoro nemakumbo zvese apo ndainwisa.
“Ipapa ndipo panguva pandakahwina mubairo wetop goal-scorer kwemakore matatu,” anodaro.
Kunyangwe hazvo aive nembiri yekubhomba achinwisa, Bomber anoti vatambi vemukashure vaimushaisa hope vanosanganisira Ephraim “Rock of Gibraltar” Chawanda weZimbabwe Saints, Francis Shonhayi weDynamos naFelix Mtutu uyo aitambira chikwata chainzi Olympics chekuBulawayo. Kuchiti kuvabati vepagedhi anoti sahwira wake, Brenna Msiska, aisada zvekunwiswa naye zvachose.
“Msiska aive shamwari yangu, takabva tese kure ende patakazosiyana zvikwata aisada zvekunwiswa neni, aindishungurudza. Asi ndakazomunwisa zvechikiribidi muRufaro izvo zvakazozarura mukana wekugara ndichimunwisa,” anodaro.
Mazuva anoswera cheBudiriro High 2 muguta reHarare achirairidza vechidiki nhabvu pasi peboka reBudiriro Academy iyo anove mwene wayo.
“Ndakatanga Academy yangu iyo yave nemakore anodarika 12. Ndine rudo rwekuona vechidiki vachibudirira muhupenyu hwavo saka ndiri kuvadzidzisa nhabvu ndichivabatsira kuronga remangwana ravo.
“Vana vedu ngatishande navo tisavasiye vachiswera vachimberereka mumigwagwa nekuti ndipo vanozopedzisira vave kutora zvinodhaka vozokanganisika hupenyu hwavo.
“Chishuviro changu kuwana vakotsveri vanokwanisa kuuya vazondibatsirawo nezvinhu zvakasiyana zvinosanganisira mabhora, mayunifomu nenhandare yakanaka yekutambira,” *anodaro Nyangela.