Makorokoza oparadza nharaunda
VAGARI vekuDonjane, kuSt George, kwaMambo Samambwa, kuKwekwe, vari kutsutsumwa zvakanyanya nekuda kwekuparadzwa kwezvivakwa, minda nemigwagwa kuri kuitwa nemakorokoza ari kuchera goridhe.
Sadunhu Ndumo, VaSteven Ncube (83), vekudunhu raMambo Samambwa, vanoti makorokoza ari kuparadza nharaunda zvikuru.
“Hongu, vana vari kutsvaga kurarama, vamwe vanobva medu muno uye kumamwe matunhu, asi dambudziko ratatarisana naro kuparadzwa kwemasango neminda chaiyo kunyangwe nemigwagwa yapera. Chikumbiro chedu kuti vana ava vapihwe nzvimbo dzine matsamba pane kuchera pose-pose,” vanodaro Sadunhu Ndumo.
Vanoti vakaendesa chikumbiro chavo kuvakuru vedunhu nekuHurumende kuti vechidiki ava vawaniswe nzvimbo dzavanoshandira pasina kuparadza zviwanikwa.
Mashoko avo anotsinhirwa naSabhuku
Matutuka, VaBernard Ncube (74), vachiti nzvimbo yavo angova makomba nemakoronga nekuda kwekucherwa kwegoridhe.
“Nharaunda yedu ino angova makomba oga-oga vechidiki ava vachichera goridhe kutsvaga kurarama. Minda chaiyo yapera kucherwa kusanganisira nemugwagwa wedu unoenda kuEmpress kubva kuZhombe.
“Tine mugwagwa unodarika panzvimbo yedu yemabhizimisi eDonjane paSt George wakambodamburwa nyaya iyi tikaisvitsa kuna mambo vedu VaSamambwa avo vakatouya kuzoita musangano nevechidiki, asi hapana chakagadzirika uye vari kutochera nemuberevere mezvivakwa,” vanodaro Sabhuku Matutuka.
Vanoti vebazi reEnvironmental Management Agency (EMA) vanogara vachivazivisa nguva dzose uye vanombouya vachitaura nemakorokoza aya.
“Izvozvi tava kutyira kuti vanhu munguva yeZhizha vanowira mumakomba azara mvura uyewo zvimwe zvivakwa zvinogona kudhirika nekucherwa kuri kuitwa muberevere medzimba,” vanodaro Sabhuku Matutuka.