Musavarairwe, AIDS ichiriko
MUSANGANO mukuru wepasi rose weInternational Conference on AIDS and Sexually Transmitted Infections (ICASA 2023) wakatanga muZimbabwe nemusi weMuvhuro svondo rino uye uchaitwa kusvika neMugovera uno.
Gungano iri riri kuitwa panguva iyo nyika ino yabudirira kuzadzikisa zvinangwa zvayo zvekumisa kupararira kweHIV panozosvika gore ra2030 zvema95,95,95 UNAIDS Targets.
Izvi zvinoreva kuti Zimbabwe yakabudirira mukuderedza nyaya itsva dzeHIV nechikamu che95 percent nekuwanisa vanhu vane hutachiona hweHIV mishonga yemaAnti-Retroviral Therapy nechikamu che95 percent zvekare.
Pamusoro pezvo, vose vari pamishonga havachagari vachirwara nekuda kwekuti masoja emumiviri yavo akasimudzirwa nekutora mishonga nemazvo nechikamu che95 percent.
Musangano weICASA uyu uri kupindwa nevaenzi vanosvika 8 000 kubva kunyika dzepasi rose izvo zvinoratidza kukosha kwawo.
Uyu ndiwo musangano mukuru unoitwa pamusoro peHIV neAIDS muAfrica kureva kuti chiremerera chinodadisa kuti Zimbabwe ipihwe mukana wekuitirwa gungano iri.
Zvisinei nekuti Zimbabwe yabudirira zvakanyanya mukurwisa kupararira kweHIV neAIDS, zvakakosha kuti veruzhinji varambe vachizvidzivirira.
Tinodaro nekuti kune vamwe vave nemufungo wekuti denda iri harisisiri njodzi kuupenyu hwavo.
HIV ichiri kupararira munyika muno uye kana veruzhinji vakada kuita zinyeke-nyeke vanopera nechakapedza mbudzi.
Zviri nyore kuti budiriro yose yaitwa mukurwisa HIV neAIDS idzorerwe kumashure kana veruzhinji vakaita zvedambe nekuda kwechirwere ichi.
Makore akatanga denda iri, pasi rose rakazengezana izvo zvakaona vanhu vakawanda vachifa nekuda kweAIDS.
Mazuva aya kwaive nerusarura rwakanyanya zvekuti munhu ane chirwere ichi aisemwa nevamwe izvo nhasi zvisisiko nekuda kwedzidziso yakasimba yakapihwa veruzhinji.
Ongororo yakaitwa nesangano reWorld Health Organisation (WHO) mukupera kwegore ra2018 inoratidza kuti vanhu vanosvika 37,9 miriyoni munyika dziri muAfrica vaive neHIV.
Vanhu 1,7 miriyoni vanonzi vakaonekwa vaine hutachiona hutsva hweHIV muna2018 pasi rose uye vari muAfrica ndivo vari kunyanya kushungurudzwa neHIV.
Nyika dziri kuchamhembe nekumabvazuva kweAfrica dzinonzi ndidzo dzine vanhu vakawanda vari kutambudzwa nedenda iri apo 1,4 miriyoni vavo vakabatwa nehutachiona hutsva muna2020.
Dunhu iri rinonzi rainge riine vanhu vanosvika 25,8 miriyoni vane HIV neAIDS mugore iri.
Chakakosha kuziva ndechekuti HIV neAIDS zviriko, saka vanhu vanofanirwa kuzvidzivirira.