Majeri akamirira vane hunhu uhu
MUTUNGAMIRI wenyika President Mnangagwa svondo rapera vakashandisa masimba avo kuti padzikwe mutemo mutsva unorambidza kupinda murudo kana kushinha nemunhu ane makore ari pasi pe18 okuberekwa uye anobatwa nemhosva yerudzi urwu anogara makore 10 mujeri.
Vakashandisa masimba aya pasi pemutemo wePresidential Powers (Temporary Measures) Act kuti paburitswe gwaro reStatutory Instrument 2 of 2024, the Presidential Powers (Temporary Measures) (Criminal Laws (Protection of Children and Young Persons)) Regulations, 2024.
Izvi zvinoreva kuti zera rekubvuma bonde rave pamakore 18 okuberekwa kwete 16 sekare apo mutemo uyu waive usati wavepo.
Danho iri riri kurumbidzwa zvakanyanya neveruzhinji pamwe nemasangano anomirira vana.
Mutemo mutsva uyu usati wakumikidzwa, pange pane mukaha mukuru sezvo zera rekubvuma bonde raive pamakore 16 asi rekuti munhu aroorwe kana kuroora riri pamakore 18 okuberekwa.
Izvi zvaipa mukana wekuti vanasikana vadiki vambunyikidzwe.
Asi iye zvino mutemo wave kuchengetedza vose vanasikana nevanakomana vane makore ari pasi pe18 okuberekwa.
Mutemo uyu unochengetedzawo kodzero dzevanasikana vairoodzwa kuvarume vakuru, kunyanya vezvimwe zvitendero zvinombunyikidza pwere kuti dziroorwe.
Pane vamwe vanhurume vane katsika kakaipa zvikuru kekunyepera kuti varotswa kuti musikana ngana anofanirwa kuve mudzimai wavo.
Chinoshamisa ndechekuti kunyangwe vabereki vevanasikana vanenge vachiri ndumurwa ava vanototenderana nazvo kuti vasiye chikoro uye voenda kunoita madzimai anasaimba ava.
Kwete, mwana anoramba ari mwana nekudaro zvakakosha kuti kodzero dzake dzichengetedzwe.
Mutemo mutsva uyu uchabatsira zvekare kuderedza huwandu hwevanasikana vanopihwa pamuviri vasati vabva zera izvo zvinokonzerawo kuti vamwe vavo vasiire chikoro panzira zvisinei nekuti vanotenderwa kuenderera mberi nedzidzo kunyangwe vaine pamuviri.
Mutongo wemakore 10 munhu ari mujeri mushure mekumbunyikidza mwana unoita kuti vapari vemhosva dzerudzi urwu vafunge kaviri uye vatye vasati vashinha nepwere.
Vanhu vanombunyikidza vana nenzira iyi vanokanganisa remangwana ravo nekudaro vanofanirwa kupihwa zvirango zvakaomarara.
Mwana ane makore ari pasi pe18 okuberekwa anenge asati ayaruka nekudaro zviri nyore kuti atsveterwe nekuda kwezvinhu zvidiki-diki.
Zvakadaro, panofanirwa kuve nedzidziso yakasimba kune veruzhinji pamusoro pemutemo uyu.
Izvi zvinoreva kuti nharaunda, vemachechi nemhuri vanofanirwa kubatana kana kuti kuita hoche-koche chaiyo kuti mutemo mutsva uyu ukwanise kushanda nemazvo.