Covid netsika
NYANZVI dzezvechivanhu dzinoti kubva kare, tsika yekuti kana munhu akarwara nechirwere chinonetsa kurapa uye chichigona kutapukirwa kuvamwe, murwere iyeye aigariswa kwake oga – uko kwaisasvikwa neveruzhinji — ozodzoswa mumusha apora.
Zvinonzi tsika yekugarisa murwere ari kwake oga yaitevedzwa zvikuru kuvarwere vemaperembudzi.
Murwere ainge aiswa kwake oga haaitenderwa kusangana nevamwe vanhu uye haatiza kunzvimbo yaainge aiswa kuti ambogara oga achirapwa uku.
Vanoziva nezvetsika yepasichigare yekuti murwere aivakirwa musososo wekugara kwake oga iyi — kunyanya kunze kwemusha — vanoti haina kumbosiyana nezviri kuitwa mazuva ano apo vanhu vari kubva kunze kwenyika vanombonzi vagare kwavo voga, vozoregerwa vachipinda muruzhinji mushure memasvondo maviri kuitira kudzivirira kutapurirana coronavirus kana Covid-19.
Coronavirus hutachiona hunokonzera chirwere cheCovid-19.
Nechinangwa chekuda kumisa kupararira kwechirwere chakaipisisa uye chabata zviuru zvevanhu pasi rose ichi, Zimbabwe yakaisa mitemo inoita kuti kana munhu akawanikwa aine Covid19, anofanirwa kumbogara kwake oga kusvikira zvaonekwa kuti haasisina hutachiona hwecoronavirus.
Vaya vanenge vabva kunze kwenyika, vanombogara kwavo voga uye Hurumende inotova nenzvimbo (quarantine centres) dziri kumatunhu ose enyika idzo dzakamirira kuchengeterwa vanhu vakadai.
Zvino kune vamwe vanhu vanonzi vari kutiza munzvimbo dzakadomwa neHurumende idzi vachinopinda muruzhinji izvo zvinoita kuti chirwere cheCovid-19 chikwanise kupararira munyika.
Votaura pamusoro petsika yekuti murwere kana munhu anofungirwa kuti ane denda rinotapuriranwa nekukasika aimbogariswa kwake oga kubva pasichigare, Mbuya Alice Kwenda Masoko (66) vemumusha weLochnvar, muHarare, vanoti zviri kuitwa neHurumende nechinangwa chekumisa kupararira kweCovid-19 hazvisi zvitsva uye zvinobatsira zvikuru.
“Kubva pasichigare kune zvirwere zvaiti zvikabata vanhu, varwere ivavo vaiendeswa kunorapirwa musango vachigara mumisososo kuitira kuti vasatapurire vamwe.
“Mazita echirungu bedzi (kuti quarantine) ave kuita kuti zviite sekunge zvitsva uye sezvinorema asi kubva nakare kune varwere vemamwe matenda vagariswa kwavo voga kudzimara apona. Kwaitova nezvirwere zvainzi kana chikabata munhu, anofanirwa kuvakirwa musososo musango uko anogara oga ozodzoka mumusha anaya.
“Sevarwere vemaperembudzi, vainorapwa vari mumisoso musango uko vaiendeserwa mishonga nechikafu pasina wavaisvika pedyo naye. Vacho vaiendesa chikafu ikoko vainochisiya mune mumwe musososo umo murwere aizochitora anenge auya nacho aenda,” vanodaro Mbuya Kwenda.
Vanoti vamwe vevarwere ava vaifira musango imomo apo mitumbi yavo yaizovigwa nevanhu vechikuru bedzi.
“Vapora vaidzoka kumisha uko vaisvikoitawo zvakare nguva vachigara mudzimba dzavo voga kusvikira zvaonekwa kuti vanaya zvizere. Kunewo mishonga yechivanhu yaipota ichimwaiwa kunzvimbo dzainge dziine misososo musango kuitira kuti chirwere chisatapukire kune vamwe.”
Mbuya Kwenda vanoti chimwe chezvirwere chakanetsa kare ifuruwenza (influenza) kana kuti chikosoro chechipembwe.
“Kungozivikanwa bedzi kuti munhu abatwa nechikosoro chechipembwe, aibva angobviswa mukati mevamwe vanhu onovakirwa musososo musango uko aigara oga,” vanodaro,” vanodaro Mbuya Kwenda.
Vanoti izvi ndizvo zvimwe chete nezviri kuitwa nenyika dzepasi rino kuvanhu vanenge vabatwa neCovid-19 avo vari kuiswa kunzvimbo dzavo voga.
Mashoko avo anotsinhirwa naMambo Njelele, vekuGokwe, VaMisheck Njelele vachiti, “Nzvimbo dzaichengeterwa nekurapirwa vaive nezvirwere semaperembudzi dzangofanana nema’quaratine centres’. Munhu aiti akabatwa nemaperembudzi kana zvimwe zvirwere, ainogariswa musango, ozounzwa kuruzhinji asisina chirwere ichi,” vanodaro Mambo Njelele.
Vanoshora vanhu vanonzi vari kutiza kunzvimbo dzavanenge vambonzi vagare vachikanganwa kuti maitiro akadaro ane njodzi huru kuruzhinji.
“Hapana chekutiza apa, ko kungogara kudzimara mazuva akatarwa akwana? Vanhu ivava vanotizei? Pamwe vanenge vaine dzimwe nyaya idzo dzavanotyira kuti dzinozobuda,” vanodaro mambo ava.