WHO yorumbidza Africa
AFRICA ndiyo yega pasi rose isina nyaya dzevanhu vari kubatwa nechirwere cheCovid-19 dziri kunyanya kuwanda pari zvino, vanodaro Dr Tedros Adhanom Ghebreyesus avo vanova Director-General wesangano reWorld Health Organisation.
Vakataura mashoko aya nemusi weMuvhuro pamusangano weFinancial Times Africa Summit uyo wakaitwa padandemutande (virtual meeting).
“Chimwe chezvinhu zvishoma chiri kufadza muAfrica, idunhu risina kunyanya kutambudzwa nechirwere ichi uye pari zvino Africa ndiyo yoga isina nyaya dzevanhu vari kubatwa nechirwere ichi vari kuwanda uyewo kudzikira kwenyaya dzevari kubatwa nedenda iri kunokurudzirwa,” vanodaro.
Vanoti nyika dzakawanda dzemuAfrica dzine zvadzakadzidza kubva mukurwisa zvimwe zvirwere izvo zvakadzibatsira zvikuru mukumisa kupararira kwehutachiona hwecoronavirus uho hunokonzera Covid-19.
Dr Tedros vanorumbidza Africa nekusimbaradza zvirongwa zvekuvheneka veruzhinji Covid-19 kunyangwe zvazvo nyika dziri mudunhu iri dzichiri kusangana nematambudziko ekushomeka kwemidziyo yekuvhenekesa denda iri.
WHO, vanodaro, iri kushanda pamwe chete nemamwe mapoka nechinangwa chekupedza chirwere cheCovid-19.
Mashoko aDr Tedros ari kuuya panguva iyo kusvika nemusi weMuvhuro uno, huwandu hwevanhu vakawanikwa vaine Covid-19 muAfrica mushure mekuvhenekwa hwave 1 577 644 apo 38 396 vakafa, sezviri mumagwaro anoburitswa neAfrica Centres for Disease Control and Prevention (CDC).
Dr Tedros vanosimbisisa kuti matanho akatorwa neWHO mukurwisa chirwere ichi akaratidza pasi rose kuti nyaya dzekuwana utano hwakanaka uye harisi dambe asi kuti ikodzero yemunhu wose.
“Kusimudzirwa pamwe chete nekutsigirwa kwenyaya dzeutano nekuve neutano hwakachengetedzeka mativi maviri ekobiri akafanana. Kana vanhu vakave nemukana wekuwana utano hwemhando yepamusoro uye vachirapwa nemari yavanokwanisa, mabhizimisi neupfumi zvinosimukira,” vanodaro.