Vanasikana vobatsirwa
SANGANO reForum for African Women Educationalists Zimbabwe Chapter ( FAWEZI) riri kusimudzira raramo yevanasikana vachiri kuenda kuchikoro nekuvabhadharira mari dzekudzidza.
Ntobile Nkiwane, uyo anoona nezvekudyidzana neveruzhinji musangano iri, anoti kubva pakatanga dambudziko rechirwere cheCovid-19 munyika muno nepasi rose, vakasimbaradza mashandiro avo nekubatsira vanasikana.
“Sangano redu rine dingindira rekubatsira vechidiki, zvikuru vanasikana munyaya dzedzidzo. Kubva pakaiswa mutemo wekuti vanhu vagare kudzimba nechinangwa chekurwisa chirwere ichi, takatanga kubatsira vanasikana vari kudzimba nezvinhu zvinosanganisira chikafu, mabhuku echikoro nezvimwe kuti vakwanise kuverenga,” anodaro Nkiwane.
Anoti donzvo guru resangano ravo nderekusimudzira upenyu hwevanasikana kuti vabudirire mudzidzo yavo.
“Takaona kuti vanasikana ndivo vanosarira kumashure munyaya dzedzidzo izvo zvakaita kuti tipindire tichitarisa mhuri dzinoshaya,” anodaro.
Sangano ravo, anodaro Nkiwane, riri kunyanya kubatsira vanasikana vari mugwaro reFomu 1 kusvika 6 nekuvabhadharira mari dzechikoro, kutenga mayunifomu nezvimwe zvinodiwa pakudzidza.
“Tiri kutenderera munyika tichivapa chikafu nezvimwe zvinosanganisira zvavanoshandisa panguva yavo yekutevera,” anodaro Nkiwane.
Anoti kune vamwe vanasikana vachiri kuenda kuchikoro vakapihwa pamuviri munguva yekurwisa chirwere cheCovid-19 avo vari kubatsirwa nesangano ravo zvakare.
“Tine vanasikana vakaitiswa pamuviri apo vanhu vakanga vagere kudzimba vatiri kubatsira kuti vadzokere kuchikoro vaine zvose zvinodiwa sezvo Hurumende yakadzika mutemo wekuti vave kubvumirwa kudzidza vakazvitakura. Tinovaitisa zvidzidzo zvekuti varege kunyara vamwe vana,” anodaro Nkiwane.
Sangano iri nguva pfupi yadarika rakabatsira zvikoro zviri kudunhu reMashonaland Central nezvinhu zvakadai sematerevhizeni, maDVD, maFirst Aid Kit, mabhini, mabhuku, masanitiser nematangi ekuchengetera mvura.
Zvimwe zvikoro zvakabatsirwa ndezvinoti Madziwa Mine Primary, Madziva Mine Secondary, Wadzanai Primary neMingchang Primary.