‘Mupedzanhamo hausi kuvhurwa’
MUSIKA weMupedzanhamo uri kuMbare, muguta reHarare, unoda kuvandudzwa kuti uve muzinda wemabhizimisi madiki neari pakati nepakati akarongeka nekudaro uchamboramba wakavharwa.
Musika uyu wakavharwa munaKurume gore rino pamwe chete nemimwe misika munyika nechinangwa chekumisa kupararira kweCovid-19.
Chirwere ichi chiri nyore kupararira kana vanhu vakaita chitsokotsoko.
Kanzuru yeHarare yakapihwa mwedzi mitatu neHurumende kuti inge yave nehurongwa hwakajeka pamusoro peMupedzanhamo hunoita kuti pasave nemaguruvhani anotora nzvimbo, ozotanga kurendesera kuvamwe vanhu mumusika uyu izvo zvinokonzera kuti pave nechitsokotsoko.
Vachitaura apo vaimema misika yemuguta reHarare – kusanganisira Mupedzanhamo neSiyaso svondo rino – VaTafadzwa Muguti, avo vanova provincial co-ordinator weHarare, vanoti nguva yakwana yekuti kanzuru ikoshese kuvandudza mamiriro ezvinhu muguta.
“Chinangwa chekushanya kwedu chinotevera kushanywa kwakaitwa naPresident Mnangagwa munharaunda yeMbare. SeHurumende, tinoshushikana zvikuru nekusarongeka kuri muMbare,” vanodaro.
“Hatidi kuona vanhu vachishandira pano (Mupedzanhamo), panofanirwa kuramba pakavharwa kwete kuti ive nhandare yevanhu vanenge vachirwira nzvimbo. Chirongwa chekutanga chekuvandudza guta chinofanirwa kuona Mupedzanhamo ichiva muzinda wezvetsika nemagariro.
“Mupedzanhamo ine zvimhingamipinyi zvakawanda.
“Icharamba yakavharwa kusvikira pave nehurongwa hwakajeka. Hatingaite hurongwa hwezvinhu zvisina maturo,” vanodaro.
VaMuguti vanoti kanzuru yeHarare inofanirwa kuona kuti pave nenzvimbo yekuti Mupedzanhamo uve muzinda wemabhizimisi madiki neari pakati nepakati uye akarongeka.
“Ngaive nzvimbo iri pamutemo yekuti vemabhizimisi madiki neari pakati nepakati vanoita basa ravo, kwete nhandare yekutengesera hembe dzemabhero izvo zvisisadiwe nemutemo,” vanodaro.
Hurumende yakadzika mutemo unorambidza kutengeswa kwehembe dzemumabhero senzira yekudzivirira kupararia kweCovid-19.
VaMuguti vanoshoropodzawo kanzuru yeHarare nekutadza kufambisa basa kwairi kuita muguta.
“Harare haisisiri Sunshine City. Yaimboyemurika zvikuru makore adarika. Asi chiri kuita kuti ive isina maturo vanhu vanotengesa zvinhu zvavo pamarobhotsi.
“Kanzuru haina hanya nekuona kuti mutemo uri kutevedzwa muguta. Tiri kungozvitora sezvinhu njee. Zvinosuwisa kuti vamwe vashandi vekanzuru vari kushanda pamwe chete nemaguruvhani anorendesa nzvimbo vachikanganisa mafambiro akanaka ezvinhu muguta,” vanodaro.