38 vafa zuva rimwe chete
VANHU 38 vakafa muZimbabwe nechirwere cheCovid-19 nemusi weChitatu svondo rino bedzi hunove huwandu hwakanyanya kukwira hwevanhu vashaika muzuva rimwe chete kubvira pakatanga denda iri munaKurume wegore rapera.
Izvi zvinoreva kuti vanhu vanoda kusvika vaviri vari kufa paawa rega-rega munyika muno neCovid-19.
Mashoko ebazi rezveutano nekurerwa kwevana emusi uyu anoratidza kuti varwere 589 vakange vafa nechirwere ichi nyika yose.
Vanhu 24 256 vange vawanikwa zvakare vaine hutachiona hwecoronavirus uho hunokonzera chirwere cheCovid- 19 munyika yose mushure mekunge vavhenekwa.
“Kusvika nemusi wa13 Ndira 2021, Zimbabwe yange yave nevanhu 24 256 vawanikwa vaine chirwere cheCovid-19 mushure mekuvhenekwa apo 13 658 vakatopona asi vamwe 589 ndokufa,” rinodaro bazi iri.
Vanhu vakawanikwa vaine denda iri musi uyu bedzi vanosvika 1 017 munyika yose.
Vanhu vakawanda vafa neCovid-19 pazuva rimwe chete nguva yadarika i34 avo vakashaya musi wa6 Ndira.
Hurumende iri kuramba ichisimbaradza matanho ekuedza kumisa kupararira kwechirwere cheCovid-19.
Munguva pfupi iri kutevera, vashandi vezveutano vachange vave kushanda pamwe chete nepamurisa nevamwe vabati vezvemutemo mumigwagwa apo vanenge vachipa chenjedzo pamusoro pechirwere ichi nekuongorora vafambi Covid-19.
Danho iri rinotarisirwa kubatsira mukudzikisa kupararira kwechirwere chisati chawanirwa mushonga wekuchirapa pasi rose ichi.
Vashandi vezveutano vanenge vari pamarodhibhuruko aya, vachapihwa masimba ekuti vanhu vavanoona vaine zviratidzo zvakarerekera kuchirwere cheCovid-19 vaende vanoongororwa pamwe chete nekuvhenekwa zvakare.
Vachange vachiyambira zvakare vabati vezvemutemo kuti vasabvumidze vanhu vakadai kuenderera mberi nenzendo dzavo.
Matanho matsva aya akaziviswa nemutevedzeri wasachigaro weAd-Hoc Inter-Ministerial Taskforce on Covid-19
— Professor Amon Murwira — nemusi weChitatu muguta reHarare apo vaitaura kuvatori venhau.
“Tawirirana kuti kuchengetedzwa kwemutemo kunofanirwa kusanganisira kupa chenjedzo pamusoro pechirwere ichi uye kuongororwa kwevanofamba.
“Pane dzimwe nzvimbo dzatichatotumira vanachiremba kuti vaongorore vanhu vanenge vari mudzimotokari kuti vaonekwe kuti havana zvipomerwa here maringe nechirwere cheCovid-19.
“Magwaro (anopihwa vanhu semvumo yekuti vakwanise kufamba panguva yelockdown) haaratidze kuti une chirwere cheCovid-19 here kana kuti hauna. Saka tiri kusimbaradza kushanda kwepamarodhibhuruko uye achange akawanda zvakare. Zvose izvi zviri kuitwa mumweya wakanaka wekuda kuchengetedza upenyu hwevanhu vemuZimbabwe,” vanodaro Prof Murwira.