Majekiseni eCovid-19: Zim iri mugwara
Mashudu Netsianda naBongani Ndlovu
PRESIDENT Mnangagwa vari kurumbidza chirongwa chekubaiwa kwevanhu majekiseni ekudzivirira Covid- 19 icho chiri kufamba zvakanaka vachiti nyika ino iri panhamba yechisere pakuva nevanhu vakawanda vabaiwa muAfrica uye pechitatu mudunhu reSouthern Africa.
Chirongwa chekubaiwa majekiseni muZimbabwe chiri kuitwa pachena kune vanoda uye pane tarisiro yekuti vanhu vanosvika 10 miriyoni vabaiwe kuti nyika ive yakadzivirirwa kudenda iri.
Kusvika nemusi weMuvhuro, vanhu 205 275 vange vabaiwa majekiseni ekutanga (first jab) ekudzivirira Covid-19 munyika yose kubvira pakatanga chirongwa ichi munaKukadzi chinove chikamu che1 percent.
MuAfrica, Seychelles ndiyo iri pamusoro pahuwandu hwevanhu vabaiwa majekiseni nechikamu che65,6 percent ichiteverwa neMorocco ine 12,1 percent kwouya Sao Tome and Principe ine 4,4 precent uye Rwanda ine 2,7 percent.
Ghana, iyo ine vanhu vabaiwa majekiseni ekudzvirira Covid-19 nechikamu che2,1 percent, iri pechishanu ichiteverwa neSenegal (1,9 percent).
Eswatini ine 1,8 percent, Malawi (0,9 percent), South Africa iri panhamba 17 ne0,5 percent apo Botswana neAngola dziine 0,6 percent panyika imwe neimwe.
Mozambique ine chikamu che0,2 percent chevanhu vabaiwa kuchiti Namibia ine 0,1 percent.
Vachinyora padandemutande ravo reTwitter, President Mnangagwa vanoti chirongwa chekubaiwa kwevanhu majekiseni munyika muno chiri mugwara rakanaka uye ndokukurudzira veruzhinji kuti vanobaiwa.
“Chirongwa cheZimbabwe chekubaiwa majekiseni eCovid-19 chiri kushanda! Zimbabwe iri panhamba yetatu muSADC pahuwandu hwevanhu vabaiwa uye pechisere muAfrica.
“Hatingadzokere shure pabudiriro yakadai kana muchikwanisa kubaiwa, ndinokukurudzirai mose kuti mubaiwe #ZimVaccination,” vanodaro President Mnangagwa.
President Mnangagwa nguva pfupi yadarika vakaparura chirongwa chepiri chekubaiwa kwemajekiseni vari kuVictoria Falls.
Vari kutungamirira chirongwa chekubaiwa majekiseni apo vari kukurudzira veruzhinji kuti vatambire chirongwa ichi.
Pasi pechirongwa chepiri chekubaiwa majekiseni ekudzvirira Covid-19, vanhu vari kutarisirwa kubaiwa vanosanganisira maticha, vakuru vemachechi nevatendi vavo, vanoona nezvekuchengetedzwa kwerunyararo munyika, vakwegura nevarwere vane zvirwere zvinoisa upenyu hwavo panjodzi.
Asi, kuVictoria Falls Hurumende yakakoka vagari vose veko vanosvika 110 000 kuti vanobaiwa majekiseni aya.